| dr.nawwaf's profile҉ਿ°●φ¸¸.»» N e F o ««.¸¸...PhotosBlogLists |  Tools  Help |
|
January 29 ::: نـــواف ::: الجزء الخامسانتهت ثالث ثانوي بخيرها وشرها . بالنسبة لي ولله الحمد انتهت هالسنه على خير وأخذت المعدل المطلوب .. وبديت بالأزمه اللي يواجها أي خريج ثانوية عامة " اختيار التخصص " راحت كل الصيفية على التقديم وانتظار القبول واختبارات القبول .. الخ القرار بالنسبة لي كان صعب جدا .. خصوصا اني ولله الحمد انقبلت بأكثر من جامعه .. وكل ماجيت استشير أي شخص يعطيني رأي غير الثاني ..!! صرت ماعدت أعرف وين أروح . كانت الوالدة دايم لما تشوفني بثالث ثانوي تقولي " شد حيلك على شان تجيب نسبة حلوة وتدخل طب أسنان وتصير مثل خالك " كل ماسألني احد وش تبي تصير كنت اقول " دختور "  اما أبوي كان له رأي ثاني .. أبوي قالي " ياولدي وش لك بالطب وعوار الراس .. اطلع بعثة وادخل ادارة اعمال وريح عمرك وخلك من جامعاتنا الفاشلة << يسمع بالوطنية  بس بمجرد ماتخرجت من الثانوية وصار الموضوع جد وانقبلت بأكثر من جامعه .. بديت أقلب الموضوع براسي وكالعادة رجعت لطبعي المعتاد " التردد بالقرارات الحاسمه " كان يومي عبارة عن " تقديم على الجامعه الصباح .. ونوم بالعصر .. واتصالات بالليل " ماخليت أحد ماتصلت عليه وسألته " يافلان شرايك بالتخصص الفلاني بحكم انك فيه .. وكل شخص يبين لي ان تخصصه اطلق تخصص بالعالم وان بدونهم كان البشرية الحين منقرضين منذ مبطي فالاخير حسمت موضوعي بين البعثه أو دخول المجال الصحي بجامعه الملك سعود بعد ماحسمت موضوعي حسيت الوالدة متضايقة من سالفة البعثه " خصوصا اني اكبر عيالها " كنت الاحظ اني كل ماجبت طاري البعثة يتغير وجهها وتتضايق وتغير الموضوع .. كأنها ماتبي توقف بطريقي وبنفس الوقت ماودها اني ادرس خارج المملكة اتصلت على مدرس مادة التوحيد الله يذكره بالخير كان دائما يعطينا نصائح باختيار التخصص قبل لانتخرج ودايم يقولنا اذا اي احد احتاج شي يتصل علي اتصلت عليه وقلت له سالفتي من البداية لين النهاية نصحني بكلمة واحدة " الاستخاره " قالي استخير ربك واطلب الخيرة منه وبعدها قرر .. ان لك خيرة بالطب بتدخله وان السفر هو الخيرة لك بتسافر باذن الله . استخرت ثلاث ايام لين ماحسيت ان دخولي المجال الصحي بجامعه الملك سعود هو الأنسب لي .. منها أكون عند أهلي وأكسب رضا أمي .. ومنها ماكون بعيد عن خوياي دخلت السنه التحضيرية للكليات الصحية .. كان معي مثل ماقلت لكم قبل سلطان وعبد الله .. وزملاء كانو معنا بمدرستي السابقة " التربية النموذجية " كنا تقريبا 18 شخص سبعه منهم من فصلي  كنا انا وسلطان وعبد الله بقروب واحد .. وبيوتنا جنب بعض لذلك كنا مقسمين الروحة كل اسبوع على واحد // .. السنة التحضيرية ..// كثير منكم قرأ هالشي ولا يعرف وش معناته بعطيكم معلومة بسيطة بدون ماتعمق بالشيعلى دفعتنا " دفعة القرادة " .. قررت جامعة الملك سعود انها تسوي سنه تحضيرية للطلاب المقدمين على التخصصات الصحية الأربع " طب .. طب أسنان .. صيدلة .. علوم طبية " بدل ماتقبلهم قبول مباشر .. وبعد نهاية هالسنه يتم تخصيص الطلاب بناء على معدلاتهم <<< شرايكم فيني وانا أشرح  يعني باختصار كانت السنه التحضيرية ثالث ثانوي الجامعه .. وبدينا مرحلة عناء وتعب جديدة كان جو الجامعه غريب علينا بحكم اننا مستجدين .. ننقز من مبنى لمبنى على شان المحاضرات .. والدكتور يشرح ويطلع ولا عليه من أحد فهمت فهمت مافهمت بسلامتك  وكان الوضع متأزم والكل يقولنا اصبرو وبتتعودون اما انا وسلطان وعبد الله ماسلم منا دكتور خخخخخخخخخ ماخلينا احد ماحشينا فيه << روح المبزرة للحين متأصله فيهم كان الترم الأول خفيف علينا وأغلبه كورسات انجليزي يعني مافيه معلومات غثيثه لذلك كان ماكنا شايلين هم مرة . انتهى الترم الأول .. وبين الترمين قرر الوالد طال عمره بعد محاولات شديدة اللهجة :d انه يشتريلي السيارة اللي ابيها بديت الترم الثاني أداوم بسيارتي الجديدة بحكم اني كنت بقروب جديد مافيه لاسلطان ولا عبد الله << مكتوب علي افارق كل خوياي .. ودوامهم كان عكس دوامي لذلك كلن كان يجي بسيارته طبعا من القرادة ثاني اسبوع شريت فيه سيارة سويت حادث .. كان خفيف الحمد لله بس النفسية انقلبت فوق تحت .. المهم حصل خير كنت ماعرف ولا كائن حي بالقروب الا واحد من طلاب التربية وعلاقتي فيه كانت جدا سطحيه .. اسمه " نايف " .. وقتها كنت توني مسجل بمنتدى جامعه الملك سعود .. وكانت لي مشاركات بسيطة واضفت من المنتدى كم شخص على شان اسالهم عن القروبات واحسن دكاترة بالترم الثاني بحكم انه صعب ويحتاج دكاترة شرحهم زين واحد من اللي اضفتهم الله يذكره بالخيراسمه " عبد الله " عرفني على ثلاثه من خوياه كانو معي بالقروب الا وهم " ابراهيم .. باسل .. عبد الكريم " .. كلمتهم مسن وقلت باذن الله بكرة نشوفكم قابلتهم ثاني يوم وصرنا نقعد جنب بعض " نايف .. عبد الكريم .. نواف .. ابراهيم .. باسل " كنا مسويين قلق بالقاعه << توهم متعرفين على بعض لكن لاجا وقت الحش والاستهبال فكو الميانه خخخخخخخخ صرنا لاطلعنا من الجامعه نتغدى سوا وبالبريكات نجلس مع بعض وقبل الاختبارات نجتمع ندرس .. كنت مرتاح لهم مرة وحسيتا نهم بيصيرون أكثر من زملاء دراسة وبس مرة من المرات كنا بكافيتريا الجامعة .. وجلسنا نسولف عن منتدى الجامعة والأعضاء اللي فيه .. جا ابراهيم وقال نواف شفيك تهاوشت مع فلانة .. قلت ياخي مخها مقفل .. والنقاش معها عقيم .. الخ << مسك خط شوي جا عبد الكريم وقال .. نواف تدري ان فلانة اللي تتكلم عنها هذي بنت عمي ..!! انا وجهي صار كوكتيل .. ماعرفت وش ارد .. شوي سكت وقلت .. بس الصراحة البنت جدا محترمه خل عنك بس <<< خخخخخخخخخ انرحم وربي على هالترقيعة المخيسة شوي ولا ابراهيم وباسل وعبد الكريم فقعو ضحك ..!! قلت خير شسالفة ؟ قال كروم : ياحبيلك تراها مب بنت عمي بس بغيت اشوف ردة فعلك << ماحقدت عليه أبد مرة الاسابيع الاولى من الفصل الدراسي الثاني بسلام .. وكل منا بدا يستعد للاختبارات .. وطبعا انا كنت شايل هم الفيزياء بالتحديد بشكل مو طبيعي بدت الاختبارات وكانت الدرجات سيئه نوعا ما بالنسبة لي السنه هذي كانت متعبه أكثر من ثالث ثانوي بمراحل ..!! وبالترم الثاني بديت أحس بالفرق بين المرحلة الثانوية والمرحلة الجامعية خصوصا بعد الاختبارات الشهرية بالمدرسة لو انظلمت بدرجة كنت اشتكي واخذ حقي وبوقتها ..!! بالجامعه اشوف الدكتور يهزأ ويرفع صوته ويتوعد بالاسالة ويظلم بالدرجات ومع هذا ماتقدر تتكلم ولا تقول شي .. على قولة خريجي الجامعة " لاصار لك عند هذاك حاجة .. الخ " قررنا انا وعبد الكريم وابراهيم بالاضافة الى سلطان نجيب مدرس فيزياء يدرسنا .. وكان القرار وقع على مدرسنا بالتربية النموذجية سابقا صرنا نروح بيته ويدرسنا تقريبا ساعه ونص ساعتين .. عرفت سلطان على خوياي الجدد ومن ثاني حصة بدو ياخذون على بعض << البركه بـ كروم اللي ماشاء الله عليه يقط على الواحد بريال لاحظنا شي باول اربع حصص اخذناها عند المدرس .. انه كل ماشربنا الشاهي حقه خدرنا وصار فينا خمول مب طبيعي .. لدرجة ان ابراهيم باخر مرة قال استأذن انا بطلع انام خخخخخخخخخخ << حسينا ان فيه شي غلط بعد ماطلعنا سوينا اجتماع سريع .. كروم افتى وقال " يازقرت شكل ابو عمارة يحط لنا منوم على شان مايركز ويسلك لنا بالشرح " << جعلك ماتستنج ياكروم قررنا المرة الجاية اننا نتفادى شرب الشاهي المخدر حق ابو عمارة .. جت الحصة الثانية وكالعادة جاب ولده الشاهي وبدأ ابو عمارة يصب صب اول كاسة شاهي واعطاني اياها .. انا عطيتها كروم .. كروم عطاها ابراهيم .. ابراهيم عطاها سلطان .. سلطان رجعها للمدرس .. استغرب المدرس وقال : اله مش عاوزين شاهي ؟ .. قلنا لاتونا شاربين شاهي ومروقين بس نبي ندرس الله يرضى عليك خخخخخخخخخخخخولله الحمد بالحصص الجاية صار يجيب لنا عصير ليمون قربت الاختبارات النهائية .. وكل واحد منا بدا يشد حيله كثر مايقدر .. مابقى شي وتنتهي السنه وكل واحد يبي يدخل التخصص اللي كان وده فيه .. أما انا كان لي سالفة ثانية مع السنه التحضيرية ..!! البرنامج الموحد زي ماقلتلكم كان اول مرة يطبقونه على دفعتنا لذلك محد فاهم وش قصته مرة من المرات جا واحد من شيبان المسجد وسلم علي .. قال شخبارك نواف وش مسوي وينك الحين انت بأي كلية .. قلتله بالبرنامج الموحد << اللي هو السنه التحضيرية قال اها .. ايه ماعليك انت تراها زينه .. لايهمونك الناس ترى التقنية تخصص كويس استمر فيه <<< بالله وش ارد عليه هذا صار لا احد سالني وينك انت الحين اقوله " بكلية الطب " .. واكثر شي كان يوترني لما يناديني احد يادكتور .. كنت اقول بنفسي الله يستر ماجيب المعدل المطلوب ولا اصير حتى سواق ..!! كرهت عمري بها السنه وبنهايتها كنت ابيها تخلص وبس ..!! المهم افتك اذكر مرة من المرات قبل واحد من الاختبارات رحنا مجموعة المطاعم اللي جنب الجامعه وتغدينا .. بعدها قلت للشباب ابي اروح التميمي اجيب لي ريد بل على شان اصحصح شوي المهم رحنا وانتظرناه لين يفتح واقفين عند البوابة وانا معي كتاب المادة اقراه متحمس ناظرني شايب وابتسم وقال " ايه ايه ادرس ياولدي ادرس .. من جد وجد .. ثم سكت وتوهق ماعرف التكملة وقال .. ومن وجد حصد " << جعلك ماتقول أمثال مرة ثانية ياعم / باخر السنه التحضيرية عرفني ابراهيم على واحد من طلاب القاعة اسمه " فهد " ادمي هااااادي بشكل مو طبيعي وحبيب وماله بأحد .. كنا دايم قبل الاختبارات نجلس ونسولف معه وكانت علاقتي فيه سطحية جدا جت الاختبارات النهائية .. والقرادة لعبت دورها معي ومرضت باختبار الفيزياء .. دخلت وحليت اللي اقدر عليه وطلعت وانا عندي احساس ان الطب طار وان القرادة لعبت لعبتها . خلصت الاختبارات وكل واحد منا جلس اسبوع بعد الاختبارات تجيه كوابيس السنه التحضيرية ..!!! وكل واحد منا ينتظر موحد اعلان التخصصات اللي كان يقوم من النوم ويحسب الاختبار ضاع عليه ..!! واللي كان يقوم من النوم ويحسب انه حل مسألة خطأ وهالمسألة ماجت بالاختبار أساسا كل واحد منا اخذ نصيبه من وسوسة الموحد ... لين ماجا اليوم اللي اتصل علي كروم وقالي نواف ترى نزلت التخصصات الحق وشف وش دخلت طلعت فتحت الانترنت ودورت اسمي .. ولله الحمد لقيت نفسي مقبول بكلية طب الأسنان .. نزلت وبشرت امي وابوي يوم شفت فرحت امي وابوي ذاك اليوم نسيت كل هموم الموحد وقلقه .. ايام السهر والمرض .. ايام كان الواحد يطلع من الاختبار يكلم نفسه من الوسوسة ويحسب النص درجة اللي احتمال تحرمه من التخصص اللي يبيه . بعد اعلان التخصيص بديت احس ان الاجازة بدت .. صرت اطلع مع اخويا الثانوية يوم .. ويوم اقابل اخوياي اللي تعرفت عليهم بها السنه " ابراهيم وفهد وكروم وباسل ونايف " بالاضافة الى صديقي العزيز سلطان الصيفية هذيك كانت تحفة من جد .. كل كلامنا فيها من أول مابدت لين مانتهت " مواقفنا بالسنه التحضيرية " كنا نجلس نحش بواحد واحد ونتذكر النكبات اللي كانت تصير ومواقفنا مع الدكاترة هذيك الفترة كان يجي واحد من اخويا عبد الكريم دايم اذا تقابلنا اسمه " أيمن " ادمي جدا حبيب ... اجتماعي وبالع مسجل مايسكت ماشاء الله عليه / انتهت الصيفية وطبعا الكل كان منطق بالرياض ماله خلق يسافر بعد حرب السنه التحضيرية / سلطان وأيمن وفهد وعبد الكريم ونايف دخلو كلية الطب بشري .. باسل دخل كلية العلوم طبية .. أما انا وابراهيم دخلنا كلية طب الأسنان مرحلة وانتهت .. انتهت بخيرها وشرها .. يمكن أهم حدث فيها هو بدايتي في كلية طب الأسنان بعد عناء وتعب الموحد .. واصدقاء جدد كنت متأكد انهم ماراح يصيرون زملاء دراسة فقط ..!! يتــبع ... |
|
|
