بسـم الله الرحمن الرحيم

شخباركم عساكم بخير ؟؟

بالجزء الأول كتبت لكم ذكريات ومواقف حصلت معي

هالمرة جت براسي فكرة شريرة <<< الله يستر منك

حبيت أكتب لكم بعض المواقف المحرجة اللي مرو فيها أصحابي سواء زملائي بالكلية او خارج الكلية .. بالإضافة الى بعض المواقف اللي جبت العيد فيها

بسم الله نبدأ  <<<<<<<

][][ الموقف الأول ][][

البطل : طلال

.. قالي مرى كنا بصحارى" ملاحظة مخلبية " <<< سوق صحارى يعتبر مكان تجمع طلاب كلية الطب وطب الاسنان بوقت البريك .. يعني ذا في يوم رحتو صحارى الظهر ولقيتو فيه كمية كائنات لابسه أزرق لاتستغربون عادي 

المهم نرجع لمحور حديثنا .. قالي كنا بصحارى .. وكنت اطلب من مطعم .. فجاه جاني الهندي عامل النظافة .. قالي سديق انتا في سوقل هنا <<<< يعني تشتغل هنا ياصديقي  <<< يحسبه عامل نظافة لانه لابس ازرق  .. موقف محرج جدا اتمنى مانحط فيه  <<< يقالي ماقد انحطيت

][][ الموقف الثاني ][][

هالموقف حصل لي قبل فترة قريبة ... مره كنت مواعد ولد عمي .. قالي نواف الله لايهينكـ جيب معك دخان مالي خلق اطلع اجيب ... قلت طيب بمشيها لك هالمرة واجيب  " ملاحظة : انا مادخن

رحت البقالة اللي جنب بيتنا .. قلت بصوت عالي .. ياسديق .. جيب مالبورو احمر .. فجاه !!! .. اشوف اخوي الصغير طالع من نفس البقالة  <<< مقرود الله يحفظكـ

ماعرفت وش أسوي ... يعني لو كلمته وقلت ترى الدخان لولد عمي بيقول هذا خاف ولو سكت ماراح ارتاح  قلت ياولد خله بسلامته وتركته واخذت الدخان اللعين ومشيت  .

][][ الموقف الثالث ][][

البطل : عبد الرحمن << اناديه يالشايب = يالبوومه  .. سبب تسميته البومه " اي خبر يضيق الصدر لازم هو اللي يجي يعلمني اياه ... يووم توفت عتاب الله يرحمها جاني الخبر من ولد خالتي استغربت .. دقيت عليه قلت : عبد الرحمن وش عندكـ قال: وشو ؟؟ قلت : غريبة مادقيت علي وقلت لي ان عتاب ماتت .. قال: اما عاد ماتت <<< انا استغربت مره مره ... قلت : عبد الرحمن بالله عليك ماتدري ؟؟ .. قال : ياخي تبي الصدق ادري ويدي تحكني ابي ادق اعلمك بس خفت تقولي الله يلعنك يالبومه  <<<< حسبي الله على ابليسك

المهم نرجع لمحور حديثنا الا وهو الموقف البايخ اللي صار لعبد الرحمن .

كان معزوم عند ولد عمه باستراحة .. ومن ضمن الموجودين واحد من طلاب طب الاسنان بسنة الامتياز .. قاله شخبارك عساك بخير .. قال عبد الرحمن .. الحمد لله بخير .. قاله شلون سنة ثاني معك قال والله كرف بس الله يعين .. قال كيف دكتور المايكروبايولوجي معكم .. قال شايب يجيب النوم .. ونص الطلاب نايمين بمحاضرته .. وبثر .. ومايعرف يشرح .. قال الولد صدق والله ؟؟ قال عبد الرحمن : اي والله الله يعين بس .. قال الولد : تصدق ان هذا ابوي  <<< ياجعلي ماصير مكانكـ يالدوووووحمي 

][][ الموقف الرابع ][][

واحد من خوياي " اسمه سلطان " كان جالس مع جدته وامه ويسولفون .. فجاه جلس يناقش امه عن شي ناسي وشو بالضبط المهم قال خويي لأمه .. يايمه صدقيني هذيك ماعندها ماعند جدتي <<< وجدته موجودة  .. .. سلطان وش تحس فيه وانا اخوك

لا وفي مرة انكب الشاهي على يد جدته وعلى الارض راح اخذ مناديل ومسح الارضيه وترك جدته  <<< لاتعليق

][][ الموقف الخامس ][][

هذا واحد من الشباب " عبد الكريم = كروم  "

كان معزوم عند واحد من الشباب << ايام السنة التحضيرية للكليات الصحية يعني قبل سنتين تقريبا .. وكانو الموجودين عبارة عن طلاب قروب واحد .. المهم واحد من الشباب فتح سالفة عمل السعودية بمجال الطب .. وعبد الكريم نقز على طووول وتكلم

قال ياخي شلون البنت تصير طبيبة ؟؟ ياخي شلون تربي عيالها ؟؟ ياخي هذولي بيطلعون تربية شغالات .. ياخي انا ماتخيل نفسي اخذ طبيبة

الفاجعه الكبري  .. أن أم واحد من اللي جالسين طبيبة  .. وكروم مايدري .. مايدري الا واحد من الجالسين .. هالواحد جلس يغمز لعبد الكريم يمين يسار .. عبد الكريم يقول رجاءا لاتحاووووول تغمزلي انا رايي ماراح اغيره  لاتحاول ارجوكـ .. الولد اللي امه طبيبة ابتسم ماعلق .. انتظر شوي وقال يالله ياجماعه استأذن وطلع ... بعد ماطلع جا الولد الثاني لعبد الكريم قاله ياخبل انت ماتدري ان ام فلان طبيبة !!! << بهذه اللحظة وجه كروم صار تلفزيون ملون على حد وصفه

الله لايحطني مكانك ياصديقي  وخيرها بغيرها

][][ الموقف السادس ][][

البطل : أنا 

هالسالفة يمكن من ثلاث اربع سنين .. مرة كنت اكلم واحد من الشباب .. وانا اكلمه ابوي دق انتظار .. قلت لخويي دقيقة ابوي يدق .. رديت على ابوي ولا قفل بوجهي .. رجعت لخويي كلمته ... رجع ابوي سوا نفس الحركة .. رجعت لخويي .. ثالث مرة .. سويت حركة غبيه علقت الخط ورحت لخط ابوي وحسبته سكر واني رجعت لخويي .. قلت يامحمد ابوي جالس يستهبل علي .. شوي ولا اسمع ابوي يقول : الو الو <<<< هلا بيييييييييك

انا من الصدمه سكرت الخط !! .. رجعت لخوويي قلت: محمد قالي هاه قلت جبت العيد !! قالي ماهي اول مره وانا اخوك ليش وش سويت .. قلت : رديت على ابوي احسبه انت وقلت ياخي ابوي يستهبل <<< جلس يضحك علي

بعد ماسكرت بخمس دقايق دق علي ابوي .. ترددت ارد مارد ارد مارد ... اخر شي رديت .. قلت :هلا يبه .. قال: هلا نواف جبت الاغراض للي قلتلك عليها .. قلت بعد شوي بروح مع السواق اجيبها .. قالي طيب زين .. قلت تبي شي ثاني ؟؟ .. قال بس تراني ماستهبل  قلت : طيب  .. وسكر الخط

][][ المـوقف السـابع ][][

هالموقف صار لي بالسنة التحضيرية .. كانت ايامها توني متعرف على ثلاثة من منتدى الجامعة " كروم + باسل + ابراهيم "

وكنا بالبريك جالسين بالكافيتيريا نتكلم عن المنتدى .. فجاه تكلم كروم قالي اي صح نواف وش صار بموضوعك هذاك ليش دخلت فلانه وتهاوشت معها .. قلت :ياخي متخلفة وتفكيرها مدري شلون ... الخ ... قال تصدق هذي بنت عمي .. قلت : تصدق ياخي ان معها حق بكلامها واني غلطان  << لاعاد ترقع مره ثانية

ولا كروم صار وجهة كذا  قلتله شفيك تضحك ؟؟ قل ترى امزح مو بنت عمي بس من نفس الديرة بس حبيت احرجك  <<< لاعاد تعيدها تكفى

][][ الموقف الثامن والأخير ][][

البطل : ولد خالتي محمد 

كنت مره جالس معه .. قلتله محمد بزران هاليومين خربو  صار البزر اللي توه بثاني ابتدائي يبي جوال وحالة !!

قالي: مادريت عن اخواني ليتها وقفت على جوال .. قلت ليه وش صاير

قالي مره كنت قاعد مع خالد وفيصل << اخوانه

خالد : بسادس ابتدائي ... فيصل : بثاني متوسط

جا فيصل سأل : محمد الحب حرام ؟؟ << محمد انصفق وجهه انصدم من السؤال

قاله محمد : وش حب وماحب ياخلفهم  .. قال ياخي احب وش فيها <<< بزران اخر زمن

قال : الله لايبلانا .. خالد شف اخوك وش يقول

وفي هذه اللحظة  فجر خالد قنبلة الموسم وقال  : يامحمد لاتلووووووومه الحب عذاااااااااااااب  <<< وووالله دنياااااااااا

وهكذا أعزائي المشاهدين .. انتهت مدونتي البثرة بسلام ووئام

اعذروني ع المصالة الزايدة بس اليوم زايد هرمون البثاره فيني ولا بغيت اكتب مدونة وانا بها الحالة  بس بناء على طلب الجمهور اجبرت نفسي وكتبتها <<<<< والله محد درى عنك

بإنتظار تعليقاتكم

وتقبل الله منا ومنكم صالح الأعمال

NeFo

كـــل عـــــام وأنتم بخيــر

شخباركم عساكم بخير <<< هالسمايل يحسسني بان اللي قدامي بثرررررررررررررررررر ويستملح مثلي بالضبط



بهذي المدونة .. أحببت أن أضع لكم أعزائي القراء بعض المواقف التي لاتنسى سواء كان موقف مضحك أو محزن أو أي شي صارلي بحياتي المخلبية .



بهذا الجزء راح أكتب كم موقف خطرو ببالي وحبيت أكتبهم

قبل تقريبا 11 سنة ... كان أبوي يشتغل بتبوك وبحكم عمل أبوي كنا عايشين هناك .. في يوم من الأيام وكالعادة قوموني أهلي من النوم الصباح على شان المدرسة .. قمت ورحت نمت على الكنبة اللي بالصالة << حركات أي سعودي مانام زين


المهم ومن حيث لا أدري حسيت بهزة ولا شوي ولا راسي ع الارض طايح على خشتي

قمت مفزوع من النوم ولا البيت كله يهز والصحون تطيح بالمطبخ وحالة ... قمت ادور اهلي مالقيت احد شميت ريحة خيانة بالموضوع .. المهم ركدت بمكاني لين ماوقفت الهزة الارضية .. بعد كذا رحت ادور اهلي .. دخلت غرفة ابوي وامي ولا ابوي جامع العائله السعيده ومغطيعهم ببطانية وهو معهم << بهذيك اللحظة حسيت اني فيش كهرب مو ادمي


قلت يبه !! قال سم ياولدي .. قلت وأنا طيب

قال تعال تعال ياولدي تعال جنبي << بعد وشو ياخلفهم


من بعدها وانا اعلنت الحرب وجلست اسبوع كامل ماتغدى مع اهلي ردعا لهم ولافعالهم الشنيعة << وبعد اسبوع سحبني ابوي من غرفتي زي الخروف قالي انطق كل معنا لا العن خيرك بس لاحنون بعدها راح شرالي لعبة كان خاطري فيها من زمان



هذا كان الموقف الاول بكل تفاصيله المؤلمه والمضحكه ومن بعدها وانا حسيت اني فيش كهرب مو فرد من أفراد العائلة الكريمة

][][ حرامي الثلاجات ][][



لما كان عمري تقريبا 5 الى اربع سنوات " باختصار كنت كورة بشوشه " .. كان من كثر حبي لجدي ولجدتي رحمة الله عليهم .. كنت انام عندهم مانام عند اهلي << قليل خاتمه جابوه وسحب عليهم .. كانو جدي وجدتي بالدور الأرضي واهلي بالدور اللي فوق ..

مرات كانو اهلي يحطوني انام عندهم فوق غصب اذا صارت جدتي او جدي مريضين ولا لهم خلق كائنات بثره مثلي .. وكنت انتظر اهلي يناموووون وطيرااااااان على جدي وجدتي تحت ابثرهم وانام عندهم

.. وكنت دايم لازم اسير ع الثلاجه تحت واكل منها مالذ وطاب .. ابوي لما شاف الدعوة كذا حط هذاك الحاجز الصغير اللي ينحط عند اخر الدرج .. على شان ماقدر اطمر واروح لجدي وجدتي


المهم فكرت بفكرة شريرة .. صرت اجيب زي المسند واركب فوقه واطمر الحاجز الصغير واتدحرج مع الجهة الثانية واروح اطمر على الثلاجه اكل منها مالذ وطاب واروح ابثر جدي وجدتي شوي بعدين ارجع بنفس الطريقة المخلبية لاهلي


واستمريت على هالحال لين ماجا يوووم ابوي كان نازل يتطمن على جدي وجدتي ولا لقى شي صغير يلعب بالدور الارضي


طبعا اللي اذكره ان مافي حركة مصارعه حرة ماسواها فيني

بس ياحبيله يطق بحنان شلوون مدري بس طقني لين جا جدي وشافه وقال ياللي ماتستحي وخر عن ولدي حسيت اني كائن مدعووم من جهات عليا محد قدي


طبعا هالموقف دايم ابوي لاجا يذكرني بدلع جدي لي يقولي تذكر لما طقيتك ذاك اليوم وجا جدك وخرك عني << يحسب الطق شي زين على شان يذكرني فيه الله يصلحه بس

لما كنت بثالث ثانوي .. كانت اختي البزرة نوف تووها داخله الابتدائي .. وبنفس مدرستي .. المهم الوالد قالي ابيك توصلها وترجعها بما انها بنفس مدرستك .. قلت ابشر من عيوني ماطلبت شي <<<<< غلطت حياتي



أول يوم دراسي كالعادة الواحد يروح متحمس وناوي يشد حيله خصوصا انها كانت ثالث ثانوي يعني سنة مصيرية تحدد مستقبل الواحد .. رحت متكشخ وجايب كل دفاتري وحالتي حالة .. ومعي اختي البثرة


نزلتها عند الابتدائي ورحت مدرستي وداومت

خلص الدوام .. طلعت رحت لها الابتدائي وكالعاده زحمممممممة مو طبيعيه ..وقفت ورحت للبواب قلت نادي باسم اختي البثرة نوف نادى مرتين ماطلعت .. قلت يمكن تاخذ شنطتها وبتتاخر دقيقتين ثلاث <<< على نياتي ياحبيلي


مرت ساعة كامله البثرة ماطلعت !!! انا مع حرارة الشمس مخي ذاب عصبت والحارس ياعيني رحمته من كثر مانادى اسمها حسيت انه بيحفظ اسمها لين ماتتخرج من الابتدائي


اخر شي قال لوحدة من المدرسات تدخل تدورها .. دخلت طلعتها وطلعت اختي البثرة شاقه الابتسامه وكانها ماسوت شي !!


قلت : خير ان شاء الله وينك هذا كله !! ... قالت: جوا !!

قلت : يعني ماسمعتي الرجال ينادي اسمك !!... قالت :الا سمعت

قلت : أجل ليه ماطلعتي طال عمركـ !! .. .... قالت: احسبه يمزح معي <<< انا باللحظه هذي بغيت ارتكب جريمة قتل باختي البثرة وادخل السجن واصير ضحية بزرة بثرة ناويه تجيب لي السكر


حارس المدرسة الصعيدي ياعيني لما سمع عذر اختي البثرة جاه احباط !!! ماتوقع فيه كائنات بها الغباء ضاق صدره وقال يابني الله يعينك عليها .. قلت امين .. قلتله ياخي مدري جايبة هالغباء من وين << جالس احاول ابعد الشبهات عني


اخذتها وركبتها السيارة وجلست اهاوش فيها واقولها يابثرة مرة ثانية اطلعي بسرعة

أوووول ماوصلنا البيت نقزت عند ابوي تصيح قالت بابا نواف صارخ علي .. قال ياللي ماتستحي ليش و .. الخ من هالكلام قلتله قل لبنتك البثرة تطلع بدري مره ثانية لا ارتكب فيها جريمة قتل قال خلاص ماعاد ابيك توصلها انا بوصلها بكرة

قلت ابركها ساعه


المهم داومت ثاني يوم ورجعت بدري لاني لحالي يارب لك الحمد ماخذت اختي .. رحت وتغديت قبل اهلي << قليل خاتمه كالعادة


شوي ولا اسمع صياح اختي نوف وصوت صراخ ابوي يقول لأمي " خذي بنتك الغبيه ذبحتني بها الشمس انتظرها "


انا صار وجهي كذا قلت يبه شدعوووة تراها صغيرة << مسوي انتقم .. قال نواف وش رايك تضف وجهك وتخليني اتغدى ازين من اني اسوي ش ثاني <<< عضيت ثوبي وانحشت


وبعد اسبوع كامل من العذاب صارت اختي كائن طبيعي تطلع بدري

ياحبيلها صارت اول مايقول الحارس نـ .. قبل لايكمل كلمة نوف تجي ركض << من الخوف مو لعيونك


وهكذا انتهى الموقف الأول بسلام





][][ ثالـث سابع ][][



ثالث ثانوي كانت من احلى المراحل بعمري .. صحيح انها عند الناس تعتبر سنة ضغط نفسي وسنة مصيرية والناس على اعصابها .. لكن فصل " ثالث سابع " كان له رأي اخر


طبعا فصلنا معروف بانه فصل متفوق دراسيا .. وداج اخلاقيا مافي مدرس ماجاه السكر والضغط والسبب فصلنا المليح


طبعنا حنا ايام اولى وثاني ثانوي كنا مسويين زحمة بس بثالث كنا ادج وادج وادج ولله الحمد والمنة والفضل عكس العالم



في موقف صار حسسني بعدها اننا صدق فصل مسوي زحمة بالمدرسة

مرة قسم النشاط الطلابي صمم مجسم صغير لبرج المملكة .. وحطوه بالفسحة عند الدرج على شان الطلاب يتفرجون عليه .. بعض اعضاء عصابة ثالث سابع اخذو المجسم وحطوه ورى باب فصلنا <<< مادري وش الحكمة

المرشد الطلابي جانا بالحصة الرابعه يقول " ثالث سابع ادري ان المجسم عندكم طلعووه بسرعه " حسيت اننا فصل شبهه << بدري توك تحس



راح اتكلم باختصار عن بعض ضحايا ثالث سابع


مدرس النحو <<< يارب يحللنا

مدرس حبيب مرة .. كل مايطري ببالي اقول ودي اروح المدرسة ازوره بس اخاف اول مايشوفني يتذكر الايام المريرة وتجيه جلطه وابتلش فيه

كان أول مايدخل الفصل يقول " اللهم اني اعوذ بك من شياطين الجن والإنس .. وحنا نرد ونقول .. امييييييييييين

اول مايلتفت على شان يكتب شي بالسبورة تـصـدُر اصوات غريبة فجاه صوت بقرة فجاه صوت ضفدع << عندنا مواهب بتقليد الاصوات

لين مافي يوم زهق وحس ان مامننا امل طلع وجاب الوكيل والمشرف

ملاحظة " مشرف ثالث .. سوري حبيييييب وسبيكة .. اما الوكيل رجب << لاحظو اسمه رجب ... اذا عصب عصب


دخل رجب وهزأ وهزأ وهزأ ... وحنا ساكتيييييين .. خلص تهزيئ وطلع .. دخل بعده المشرف قال سامعين الكلام ولا لا ... واحد من الطلاب قال يالله بس سكر الباب وراك ولايكثر والفصل كله فقع ضحححححححححححك ضاق صدره المسكين وطلع


الضحية الثانية مدرس الفيزياء

اسمه رشوان وندلعه رش رش

هذا مسكين من كثر ماهبلنا فيه .. مرة كانت عندنا رحلة للجنادرية

وكانت وقت الرحلة بحصته .. قاله الوكيل انت روح مع فصل ثالث سابع الباص ... قال لأه لأه .. على جووستي << يعني على جثتي

اخر شي رضى بالامر الواقع وراح معنا .. اول ماركب الباص قلنا بصوت عالي " حيو معانا رش رش حيو معانا رش رش صرخ وقال يابني حرام عليكم ربنا ياخود بيوتكوم




الضحية الثالثة مدرس الحاسب

هذا لنا سوابق معه درسنا حاسب باول ثانوي شهر واحد وماكمل قال مادرس هذا الفصل لو ايش

مدرسنا اللي درسنا حاسب بثالث مرض وجا هذا بداله .. اول مادخل وشافنا وتذكر اشكالنا تنهد وقال الله يعين << رحمته

حط اغراضه وقال اسمع انتا وهوا .. السنه دي سنة مهمه بالنسبة ليكوو .. واي استعباط اوبلطجة .. حاخصم عليكو درقات .. وحاخرب بيت بيتكوم انتو سامعيييييييييييين .. قلنا حاضر


اووووول مالتفلت على شان يكتب العنوان .. عاد المهرجان من جديد ضاق صدره المسكين ورمى اغراضه بالارض وطلع من الفصل





اتمنى انهم يحللونا مع اني اشك بها الشي

فعلا كانت من أروع سنوات عمري .. وبعدها تفرقنا اللي سافر امريكا واللي دخل هندسة واللي دخل ادارة ... الخ


بس ذكرياتها للحين ببالي ومستحيل الواحد ينسى لحظات زي كذا



الا ليـــت الزمن يرجع !!

ولا الليالي تدور
ويرجع وقتنا الأول وننعم في بساطتنا
زمان أول أحس انه زمان فيه صدق شعور
نحب ونخلص النية وتجمعنا محبتنا

زمن مافيه لاغيبه ولا حتى نفاق و زور
ياليته بس لو يرجع
ونسترجع طفولتنا
صغار قلوبنا بيضاء
نعيش بعالم محصور
ولا نعرف أبد أغراب ما غير عيال حارتنا

صحيح صغار بالتفكير لكن ماعلينا قصور
نخطط نكسر اللعبه وتسعدنا شقاوتنا
نروح المدرسه بدري
ونضحك داخل الطابور
نحاول نزعج العالم
في روحتنا و جيتنا
وعشان نأخر الحصه
نخبي علبه الطبشور
نشاغب بس في الآخر تميزنا برائتنا

نحب الضحك والهيصه نحب ننط فوق السور
نفرفش ليه مانفرفش
مادام الضحك عادتنا
كبرنا وصارت الدنيا تصف أحزاننـا بالـدور
وتهدينا الألم والهم غصب عن عيـن رغبتنـا
تعبنا من بلاوينا احد ضيـق واحـد مقهـور
وكلن غارق بهمه وبالآخـر ....... تشتنـا...
وانا ما اقول غير الا ياليـت الزمـان يـدور
ويرجع للورى فترة ونعدل وضع ... عيشتنا !!
الا ليت الزمان يرجع ..ونسترجع طفولتنا


احس كل من قرأ القصيدة قال نواف فاهم الثانوية غلط يحسبها تبدأ من ال 16 سنه

هو صحيح اننا ماكنا نلعب بالطبشور .. وكنا نسوي بالمدرسين اشياء أسوأ بس هذا مايمنع اننا كنا بريئين ونحاول نطلع طاقاتنا المكبوتة

هذي صورة معبرة جدا




لقيت الصورة بقوقل واعجبتني ذكرتني بخششنا لما كنا بزران



وهكذا انتهت مدونتي البثرة بسلام .. اتمنى ان تكون قد حازت على رضاكم .



بإنتظار ارائكم


وتقبل الله منا ومنكم صالح الأعمال



NeFo