| dr.nawwaf's profile҉ਿ°●φ¸¸.»» N e F o ««.¸¸...PhotosBlogLists |  Tools  Help |
|
April 29 ..// الجزء الثاني ..// نــــواف// بعد مانتقلنا للرياض كانت فرحتي كبيرة خصوصا ان اغلب اللي بعمري من أقاربي كانو بالرياض .. الشخص الوحيد اللي كانت علاقتي فيه قوية ايام دراستي وحياتي بتبوك هو ولد عمتي " عبد الرحمن " ولد عمتي عبد الرحمن من الاشخاص اللي لي معه ذكريات لاتنسى بتبوك .. كانت ولازالت علاقتي فيه قوية جدا ومميزة عن باقي اقاربي .. كنت كل ويك اند اخذ عفشي واروح بيت عمتي واجلس عندهم الويك اند كله . اتذكر مرة من المرات كان ولد عمتي الكبير يلعب بكمبيوتر اعتقد الجميع منكم يعرفه  احس كل من شاف هالصورة قال ااااااااااه على ايام وذكريات هالكمبيوتر وعلى العابه اللي مستحيل الواحد ينساها " ماريو ولعبة الصيد اللي ماتصيد البطة الا اذا لصقت المسدس على التلفزيون  .. وغيرها من الالعاب اللي كان احلى مافيها بساطتها "// نرجع لموضوعنا .. كان ولد عمتي يلعب بكميوتر" العائله" << اسم الكمبيوتر .. وكان يلعب بالتحديد " الكابتن ماجد " وكان موصل للمباراة النهائية ومتحمس وكل بنات عمتي وعيال عمتي حوله متجمعين متحمسين على المباراة  وفجاه يجي البطل نواف يدخل عليهم وبيده خياره ياكلها ويهز براسه .. وفجاه وبدون قصد دعست على السلك حق الكمبيوتر وفصل ... فجاة كلهم ناظروني وصرخو باقوى ماعندهم " نواف وش سووووويت !!!! " انا وجهي صار احمر وجتني الصيحة ورحت ركض لعمتي اصيح عندها خخخخخخخخ : D موقف من جد مستحيل انساه . // قبل لاننقل للرياض بشهور نقلت عمتي لجدة ... وبكذا حسيت بكئابه بتبوك غير طبيعيه وكانت فرحتي بنقلنا للرياض مرة كبيرة . طبعا بحكم اني انتقلت لاكثر من مدرسة بسبب الظروف اللي صارت ... ماكنت متضايق اني نقلت مدرسة جديدة .. بس تعودت اني لازم بكل مكان اكون صداقات ولو بسيطة بأي مكان اكون فيه . اول صديق لي تعرفت عليه بالرياض وبالتحديد بالمدرسة كان " باسل " باسل من الاشخاص اللي مستحيل انساهم .. صداقتنا استمرت من هذاك الوقت الى الان .. ودرسنا مع بعض الى ثالث متوسط . عرفني على صديقه واللي صار من اعز اصحابي بعد كذا .. اللي هو " محمد " .. وصرنا الثلاثة دائما نطلع مع بعض ونزور بعض دايم . انتهت رابع ابتدائي بخيرها وشرها .. يمكن اكثر شي تعقدت منه هالسنه هو القواعد عقدتي لين ماتخرجت من المدرسة .. " يمكن لو سالوني بعد ماتخرجت من الثانوي وش تعرف عن القواعد اقولهم اللي اعرفه ان " على" حرف جر واللي بعدها اسم مجرور .. وصلى الله وبارك كانت مرحلة خامس ابتدائي افضل بكثير من رابع خصوصا اني كونت صداقات وكنت مستعد نفسيا لها السنه .. خصوصا اني بنفس الفصل اللي فيه خوياي الاثنين " باسل ومحمد " المميز بها السنه ان اخوي دخل المدرسة " اولى ابتدائي " وسجل بنفس مدرستي .. وطبعا ابي اسوي قدام خوياي الولد الحنون الكبير اللي بكل فسحة يشتري لاخوه فطوره ويجي يساله اذا في احد هاوشه او زعله على شان يفزعله .وكعادة أي شاب سعودي عنده اخ بنفس المدرسة .. يهتم فيه اول اسبوعين بعدها لا اعرفك ولا تعرفني يمكن مافي حادثة معينه او شي معين بها السنه يستحق اني اكتبه .. اغلبها كانت لحظات بريئه وعفوية يمكن الكل مر فيها .. بس اللعبة مستحيل انساها واللي كنا طايحين فيها هذيك السنه .. لعبة .. جلاد حرامي عسكري .. الخ وكنا دائما نلعبها بحصة الاستاذ سعود الله يذكره بالخير .. شخص مستحيل انساه وله موقف معي بسادس مستحيل انساه .. كان دائما يعطينا حصة درس وحصة مايعطينا شي ويقول سوو اللي تبونه .. وكان مرات يجي يلعب معنا حرامي جلاد بس الله يهديه اذا صار هو الجلاد كان يجلد من قلب  سادس ابتدائي يمكن هي المرحلة اللي أي طفل سعودي يدرس بالابتدائي امنيته يوصلها .. المرحلة اللي البزر يحس فيها انه اقوى واحد بالمدرسة تقريبا كان هذا شعوري انا وباسل ومحمد هالسنه .بسادس صار موقف مستحيل انساه .. اللي هي اول مرة بحياتي ارد على امي !! في يوم كنت بغرفتي العب بالكمبيوتر ومتحمس .. امي كعادتها اليومية جت وقالت لي : نواف العشا جاهز .. رديت عليها وقلت : طيب ان شاء الله .. وكملت اللعبة كاني ماسمعت شي بعدها رجعت الوالدة وقالت : نواف يالله العشا تاخرت علينا .. رديت عليها ورفعت صوتي شوي وقلت : طيب قلت خلاص !!! ناظرتني امي باستغراب وماعلقت على هالتصرف ومشت . بعدها بلحظات وقفت اللعبة وجلست افكر بالتصرف الغريب اللي ماعمري سويته طول الفترة الماضية .. عمري مارديت على امي وعمري ماكلمتها بها الطريقة .. قمت ورحت اتعشا " او بالاصح ابي اشوف ردة فعل امي من اللي سويته " .. رحت ولقيتها مو على السفرة .. رحتلها الغرفة لقيتها تصيح .. ركضت عليها وجلست اصيح واعتذرلها على اللي صار // ... جيـــل اليــــوم ...// للاسف جيل اليوم اول مايطلع من بطن امه الظاهر يصارخ ويقول طيب لاتدفون بشويش طالع !!! صدق لاشفت البزر اللي ماكمل ست سنين ينافخ على امه اقول : والله زمن !!! // بنهاية السنه بسادس ابتدائي كنت وطبعا كعادة أي شاب سعودي مخلص اختباراته النهائيه .. جالس العب كورة بالملعب حق مدرستنا " اجازة من قدي " شوي وجاني اخوي ابراهيم يصيح .. سالته شسالفة قالي : واحد طقني .. قلت ورني اياه .. رحت لقيته واحد برابع ابتدائي .. مسكته وصكيته كف باقوى ماعطاني ربي << ومستانس .. البزر راح يصيح .. تركت اخوي وقلتله اذا كلمك مرة ثانية قلي .. ورجعت اكمل الكورة شوي ولا جاني البزر ومعه ابوه .. وابوه بدون أي نقاش شفته جايني مسرع .. لحظتها فكرت " ياترى وش نيته هالحبيب " .. جاني ومسكني وقال لولده : هذا اللي ضربك .. قال : ايه هذا هو .. مسكني وضربني ضربة على خشمي ونزف خشمي بعدها دم .. جلست اصيح وعلى حظي وقتها كان الاستاذ سعود توه طالع من المبنى وشاف هالمنظر !! جا ركض ومسك عقاله وبدون مايسال وش السالفه ولا من الغلطان مسك الرجال وضرب فيه .. بعدها وصل الموضوع للادارة بحكم ان المدرس تدخل فيه .. واتصلو على ابوي وجا وسمع السالفة من المدير . بمجرد ان ماطلع الاستاذ سعود وابوي من غرفة المدير .. الا اسمع الاستاذ سعود يقول لأبوي " ها ودك نجلده هالسوري اللي مايستحي " ؟ ناظره ابوي وابتسم ابتسامه عريض وقال " والله مب شينه تصدق " << زاحفين الله يصلحهم انتهت مرحلة الابتدائي بخيرها وشرها .. الشخصية اللي مستحيل انساها بها المرحلة هو الاستاذ الرائع " سعود " واللي علاقتي فيه استمرت الى ماتخرجت من الثانوية .. كنت دائما على اتصال فيه وكان دائما يدق على الوالد ويساله عن دراستي ويقوله " للحين ولدك درج بالقواعد " << قمة التحطيم بالاضافه الى خوياي واللي كملو معي مرحلة المتوسطة " باسل ومحمد " مرحلة المتوسط يمكن هي المرحلة اللي شخصية الواحد تبدأ تتغير وتصرفاته تتغير وبشكل جذري .. وهالشي يصير مع الكل بالنسبة لي .. مرحلة المتوسط كانت مرحلة مختلفة تماما .. مرحلة مريت فيها بتجارب لأول مرة امر فيها بحياتي ... اول مادخلت المتوسطة كنت مستغرب من الكائنات اللي شفتها .. اشياء ماكنت اشوفها بالابتدائي ولاتعودت اشوفها بأي مكان .. ناس تتضارب بالزاوية وواحد يدخن بالجهة الثانية والثالث يتكلم بكلمات ماقد سمعتها بحياتي ... كنت منصدم من الوضع وكانو خوياي باسل ومحمد نفس حالتي .. الغريب ان غالبية طلاب الصف انسجمو مع الوضع وكانه طبيعي وان هذا اللي المفروض يصير لأي طالب يدخل مرحلة المتوسط ...!! وكأنهم يقولون " البراءه بالابتدائي وبس " اولى متوسط كانت اصعب مرحلة بالنسبة لي .. ومن السنوات اللي مستحيل انساها . يمكن اغلبكم يتوقع ان السبب انها مرحلة جديدة مختلفة عن الابتدائي وصعب الواحد يتأقلم فيها .. لكن السبب كان هو غياب الوالد عن البيت طوال هالسنه وسبب هالغياب هو رحلة العلاج لأخوي محمد خارج المملكة .. واللي بدأت من خامس ابتدائي الى ماوصلت اول متوسط . بداية العلاج كان ابوي يسافر شهر شهرين مع اخوي وبعدها يرجع هو واخوي ولكن للاسف نفس النتيجة !! مع اني كنت صغير ولا افهم وش يفكر فيه الشخص اللي قدامي الا اني كنت احس بأبوي وهو حاس باليأس وانه وده يسوي اي شي على شان يعالج حالة اخوي اللي مالقى لها علاج .. كنت اشوف نظرات الحزن وهو يشوف اخوي محمد وهو حاله غير حال باقي الاطفال اللي بسنه باولى متوسط زاد التعب على اخوي واضطر ابوي انه يترك عمله ويطلع رحلة علاج كاملة ويتابعها بنفسه وكانت لمدة سبع شهور تقريبا .. قبل لايسافر ابوي قالي كلمة يمكن اثرت فيني كثير وحسستني لأول مرة بالمسؤولية .. " نواف ترى انت رجال البيت " اول مرة بحياتي احس اني مسؤول عن احد وبها السن اللي ماكنت فيه مسؤول حتى عن نفسي عشت هالشهور وانا مابين قلق المتوسط وبداية مشوار هالمرحلة .. ومابين التفكير بأخوي محمد وعن حالته .. ومابين مسؤولية اهلي . رجع ابوي من رحلة العلاج .. وللاسف مالقو علاج لأخوي محمد .. اللي يقول " عين " .. واللي يقول " ماله علاج " واللي يقول علاجه بالدولة الفلانية .. وابوي احتار ولا عرف وش يسوي لما حس بالعجز نصحه احد زملائه بشيخ يقرأ ومعروف انه يعالج هالحالات .. وافق ابوي وقال ماباليد حيلة هذا اخر حل .. خصوصا ان الفترة الاخيرة زاد مرض اخوي وتازمت حالته . اخذ محمد وراح .. اما حنا قعدنا بالرياض وجتنا خالتي تقضي الاجازة عندنا .. بعد سفر ابوي بيومين .. قمت من النوم على صراخ الوالدة وهي تقول " اكيد ولدي فيه شي " .!!! قمت ولقيت خالتي تحاول تهدي فيها .. جيت وسالت خالتي شسالفه !! تقول امك حلمت ان محمد تعبان وان فيه شي جلسنا نحاول انا وخالتي نحاول نهدي فيها لكن مافاد .. بعدها بساعات جانا اتصال ابوي اللي قالنا ان اخوي محمد " توفى " .. رحمة الله عليه . كانت اقوى صدمه لي بحياتي .. والى الان اعتبرها اقوى صدمه لي .. بكيت ساعات وساعات .. تأزم البيت كله من صغيرنا لكبيرنا . اما ابوي كانت حالته اسوأ من الكل .. ابوي كان محمد عنده غير .. كانت صدمته اكبر وحالته اسوأ بكثير عننا .. خصوصا انه كان متفائل برحلة العلاج وكان عنده امل ان حالته تتحسن .. لكن ارادة الله كانت فوق كل شي . لما كنت اشوف حالة امي وابوي ارحمهم واحس بضيقة !! ويصير ودي اهون عليهم .. لكن حالتي كانت سيئه وكنت ابي من يهون علي هالصدمه . كلنا كنا فاقدين محمد .. وفاقدين ابتسامته البريئه اللي اذا ابتسمها كل البيت فرح .. واذا تألم كل البيت تضايق وعاش بحالة حزن . رحمة الله عليه .. والله يجمعنا فيه بجناته . كانت اصعب ايام مرت علي بحياتي .. كنت دائما بغرفتي ساكت وافكر وافكر وبنهاية كل مرة تنتهي مرحلة التفكير بنوبة بكى مستمرة لين ماتعب من كثر الصياح وانام . الفترة هذيك باسل ومحمد وقفو جنبي وحاولو كثر مايقدرون يخففون عني .. وقتها حسيت بقيمة الاخويا او خلني اقول " الاخوان اللي ماجابتهم امي " .. وقفو معي وقفة مستحيل انساها .. وقتها عرفت انك تصاحب ناس كثير شي سهل جدا .. بس انك تلقى صاحب تقدر تقول عليه " اخ " شي صعب .. واللي يلقى هالأخ يعتبر محظوظ و يعتبر شخص غبي لو فرط فيه في يوم من الايأم . // يتبع ... April 24 //.. مقدمة ..// نـــوافالسلام عليكم ورحمة الله وبركاته أخباركم عساكم بخير في البداية أعتذر عن انقطاعي المفاجيء عن التدوين . لكن بالفترة الماضية حبيت اكتب شي جديد ومميز بنفس الوقت . فكرت فكرت فكرت لين راسي انفجر  مالقيت شي .بعدها قلت " طيب ليش ماكتب شي لنفسي " دائما كانت مدوناتي مخصصة لكم .. وكنت احرص على انها تعجب الجميع . لكن هالمرة بصير أناني .. وبكتب شي لنفسي .. شي اذا زهقت وحسيت اني ابي استرجع ذكرياتي دخلت مدونتي وقريت اللي كاتبه. هالشي يمكن الكثير منكم ماراح يقراه لانه ممل بعض الشي .. لكن اعتقد انه بيكون شي رائع بالنسبة لي خصوصا انه يعرض ملخص حياتي من اول مانولدت الى الان .. اتذكر الاشخاص اللي مرو بحياتي وكان لهم أثر بحياتي او كانت لهم بصمة فيها . طبعا الكثير منكم يحتفظ بدفتر خاص فيه يكتب فيه اي حادثة مهمة مرت بحياته .. اي ذكرى سواء كانت مؤلمه او لحظة حلوة مستحيل ينساها .. ويرجع لها الدفتر بين فترة وفترة . اما انا ماعندي دفتر للاسف لأن أكره ماعلي الكتابة لاسباب شخصية << ابد مو على شان خطه خرابيش دجاج  .. لدرجة اني مرات لاجيت ارجع لأي دفتر لي ابي معلومه معينه انصدم اني ماني قادر اقرأ اللي كتبته  << ومستانسعلى شان كذا فكرت اني استغل حبي للكتابة بمدونتي المتواضعه واني اخلي مذكرتي ودفتري الخاص فيها . في البداية راح اكتب عن طفولتي البريئه << امحق بريئه راح اكتب الاشياء اللي اتذكرها ولا نسيتها للحين // في البداية اسمي نواف .. كائن حي مولود في عام 1987 .. السادس من اكتوبر << من القرادة مولود بوقت الحرب اللهم لاحسد بداية حياة جميلة .بداية حياتي كانت في تبوك .. بحكم ان جدي كل تجارته كانت هناك ..وابوي كان الفترة هذيك ساكن مع جدي وجدتي لانهم كبيرين بالعمر وكان هو اللي يهتم فيهم خصوصا ان جدي لما كبر بالسن ماعاد يشوف .. وكان ابوي هو اللي يساعده بكل اموره . طبعا ابوي كان المحبوب عند جدي من بين كل اولاده .. وكان دايم يقوله اذا جاك اول ولد باخذه لي << فاهم الموانه غلط خخخخ ومرت الأيام والأيام وفي السادس من اكتوبر عام 1987 الموافق الخامسة فجرا .. خرج نواف الى الحياة ملاحظة بسيطة .. من زود ماني نشبة جلست ببطن امي عشر شهور مو تسع زي العالم والناس خخخخخخخ << حتى وانا توني مانولدت بثر طبعا جدي وجدتي فرحو فيني بشكل مو طبيعي .. وجدي قال لابوي : ولدك بسميه نواف << سبب التسمية الله اعلم ولا الوالد كان ناوي يسميني شي مو كويس ابدا بس زين الحمد لله جت على نواف يمكن اكثر شي اعتبر محظوظ فيه اني كنت المدلل بين ابناء عمي عند جدي وجدتي .. وكنت الشخص الوحيد اللي عنده تصريح بانه يلمس صلعة جدي كنت دايم اذا زهقت من اللعب مع الصغار اروح لجدي ركض واخمه وبعدها ابدا المس بصلعته خخخخخخخخخ وكان ابوي يعصب من هالحركة ويقولي وخر عن جدك ياولد بس طبعا جدي يصارخ عليه ويقوله لاتكلمه مالك شغل الا نواف <<< ابد ماخقيت مع نفسي  كان دايم جدي اذا بيسافر مع ابوي على شان تجارة او شي كان نواف يخش غلط بالسالفة ويروح معهم .. وكل ماراحو جدي وجدتي مكان كنت معهم .. حتى النوم كنت انام بالدور اللي هم فيه واسحب على اهلي << جابوني وسحبت عليهم صدق اني قليل خاتمه بعد ولادتي بسنه جا اخوي الثاني " محمد " .. وكانت فرحة ابوي الثانية وسماه على اسم اخوه الكبير . من المواقف اللي مستحيل انساها بهذيك الفترة .. اليوم اللي احترق فيه بيتنا . في يوم من الايام صحيت من النوم بنص الليل وقمت اشرب موية قمت ولا شفت الستارة والسجاد محترقة .. انا ماستوعبت وش اللي صاير بس حسيت انه شي مب زين ابد .. رحت وركضت عند ابوي وصرخت عليه لين صحى .. قام ولقى الدنيا مولعه . الحمد لله يمكن محد جاه شي لا انا ولا اهلي .. لكن يمكن اكثر شي كنت اصيح عليه كمية افلام الكرتون اللي احترقت  كان ابوي كل ماسافر دولة يجيب لي منها توم وجيري وبسيط وسانشيرو وساسوكي << وكل الشلة الطيبة هذي الله يذكرها بالخير طبعا كانت احلى اوقاتي اقضيها بالمزرعه حقتنا .. كنت دايم اول مادخل المزرعه انطلق على أي حيوان اقصر مني وانتفه باقوى ماعندي وانا اطقهم من هنا والعمال يشتكون ابوي من هنا بعد حادث الحريق بشهور.. .. توفى جدي رحمة الله عليه .. كانت صدمه لكل عياله خصوصا ابوي .. بوقت العزا ماكنت فاهم وش اللي صاير بس يمكن اكثر موقف مستحيل انساه لما ابوي راح لخويه وكان يصيح من قلب .. مافهمت ولا استوعبت الا بعد كم يوم . // بعدها بسنه تقريبا جا اخوي الثالث " ابراهيم " .. سماه ابوي على جدي رحمة الله عليه .. وانتقلنا بعدها للمدينه المنورة . درست بالمدينه من التمهيدي الى ثاني ابتدائي يمكن اكثر شي مهم صار بالمدينه هو ولادة اخوي البطة " احمد " احمد ترتيبه الرابع بينا .. هو اكثر اخ احبه بين اخواني يمكن لانه مسالم وكانت طفولته جدا فلة اتذكر كنا انا وخالاتي نمسكه بالدور نصور فيه وهو ياعيني ساكت باللفة مايتكلم ولا شي ويناظر باستغراب كنه يقول " وش عندهم هذولي مستانسين على وشو "عيد المدينه من الاعياد اللي مستحيل انساه .. عيد مميز وفعلا تحسه عيد << ابد زينا بالرياض بعيد الفطر نزلت ومريت جيراننا وطقيت عليهم الباب وكل من فتح ناظرته وقلت " كل عام وانت بخير " << يعني العيدية بسرعه الله لايهينك .. اتذكر عجوز يوم شافتني خمتني وجلست تلعب بخدودي ودخلتني بيتها وجابت لي حلويات وقالت كل لاتستحي << عاد مالقيتي الا انا بستحي وبالاكل بعد اكلت من هالحلويات لين انتفخت // بصيفية ثالث جا لأبوي خبر من عمي ان جدتي مريضة ولازم الكل يكون جنبها هالفترة .. رجعنا لتبوك وجلسنا فيها تقريبا سنه درست فيها انا رابع ابتدائي واخوي ابراهيم دخل التمهيدي .. :: ملاحظة :: يمكن مستغربين ماجبت طاري اخوي محمد " اخوي اللي اصغر مني بسنه " السبب ان جاه مرض وعمره سنتين وهالمرض خلاه مايتكلم ولا ياكل بشكل طبيعي ولا يفهم وش اللي صاير حوله .. تقريبا اعاقة وهالشي خلاه مايدرس واغلب الوقت كان ابوي يحاول يعالج فيه داخل المملكة قبل لا يبدأ بعلاجه خارج المملكة .. اللي بدأت بمجرد وصولنا الرياض . // بعد مارجعنا لتبوك اشتد المرض على جدتي وتوفت رحمة الله عليها .. وبعدها ابوي انتقل الى الرياض بحكم ان اغلب اخوانه هناك .. وكملنا باقي حياتنا هناك .. واغلب المواقف المخلبية واللي مستحيل انساها كانت بالرياض .. // يمكن اكثر شي مستحيل انساه بالفترة اللي كتبتها لكم ... جدي وجدتي رحمة الله عليهم .. كان لهم فضل علي وكل لحظة قضيتها مع جدي سواء بالسفر او بالبيت مستحيل انساها ... رحمة الله عليه . يتــبع .... |
|
|
