| dr.nawwaf's profile҉ਿ°●φ¸¸.»» N e F o ««.¸¸...PhotosBlogLists |  Tools  Help |
|
May 27 //.. الجزء الثالث ..// نــــواف//
جت اجازة الصيف وانتهت .. ولاحسينا فيها .. كانت من أصعب اللحظات اللي مرت على البيت كله .
يمكن كان فيه شي وحيد يهون على البيت كله .. اللي هي اختي " اخر العنقود " .. نوف
مــلاحظة :: اوجه رسالة اعتذار لاختي الجميلة لاني سحبت عليها ولا جبت طاريها .. راحت عن بالي وانا اكتب الجزء الثاني مدري شلون نسيتها .. ع العموم حصل خير << مادرت عنك جالسة تلعب سوني
طبعا نوف اخر العنقود والبنت الوحيدة اللي بينا .. على شان كذا كانت فرحة اهلي فيها غير يعني اقدر اقارن فرحتهم فيها بفرحتهم فيني بس انا اكثر شوي << حركات رابع ابتدائي
نوف كانت هدية من الله سبحانه وكانه عوض صبر ابوي وامي وتعبهم بأخوي محمد بـها الطفلة .. كانت بهجة البيت كله خصوصا ان وقتها كانت توها تمشي .. وكان البيت كله مبسوط خصوصا ابوي الله يحفظه . بدأت السنه الدراسية الجديدة وكان البيت كله طبيعي الا " أنا "
كانت تصرفاتي هذيك السنه غريبة من بدايتها الى نهاية السنه تقريبا ... مادري هل اقتنعت اني لازم اصير زي باقي الطلاب اللي بالمتوسط على شان اتكيف على الوضع !! ولا ظروف وفاة اخوي اثرت فيني ... مادري وش السبب الرئيسي بس اللي متاكد منه اني ماكنت طبيعي هالسنه . دخلت سنه ثاني متوسط باعصاب باردة غير العادة .. عادتي كل سنه كنت ارتب نفسي واحس اني داخل السنه الدراسية بحماس اما هالسنه كنت داخل بتبلد مو طبيعي وهالشي يمكن لاحظه الكل سواء امي وابوي او اصحابي باسل ومحمد . السنه هذي تعرفت على شخص جديد اثر بحياتي بشكل كبير خصوصا هالسنه .. اللي هو " محمد " .. او الشيخ محمد زي ماكنت اناديه .. كنت دائما اذا شفت محمد حسدته .. شخص محبوب من الكل وشخص ملتزم .. كان محمد مؤذن مدرستنا وكان زميلي بالفصل وانتقل لفصلنا بثاني متوسط . كان محمد ينصحني دائما اذا شافني سويت شي غلط كان دائما يقولي عبارة عمري مانساها " يانواف انت شخص رائع بس ليه مصمم تصير كذا !! "
كانت الجمله هذي اكبر دليل على اني تغيرت هالسنه وان في شي غلط صاير .. والدليل ان الشخص اللي ماعرفني الا من شهور حس ان هذي مو شخصيتي .
اما محمد وباسل .. اعز اصحابي واللي بمقام اخواني .. بدأت زياراتهم لي تخف .. وكأنهم يبوني احس بأني متغير وان في شي غلط فيني لازم اغيره قبل لا اخسرهم واخسر الكثير . انتهى الترم الأول وجبت تقدير جيد جدا " على ماذكر 89 " .. كانت اول مرة بحياتي اجيب هالتقدير . امي انصدمت وجلست تهاوش وتقول اصلا من بداية هالسنه مو طبيعي ومهمل ووو ..الخ
ماهتميت ولا علقت وكأن الموضوع طبيعي .. بعد صدمة الشهادة بكم يوم ناداني ابوي الغرفة .
قالي : اسمع يانواف بقولك شي .. يمكن الظروف اللي مرينا فيها خلتك تشيل مسؤولية وانت توك صغير .. ويمكن انت متاثر بوفاة اخوك للحين وحاط هالشي عذر في اهمالك لدراستك .. بس ودي اقولك هالكلام وبعد كذا ماراح اعيده لك لين تتخرج من الجامعه .
انت حر بمستقبلك .. تبي ترسب ارسب .. تبي تترك الدراسة مرة وحدة اتركها .. سوي اللي انت مقتنع فيه المهم انك تتحمل مسؤولية تصرفاتك .. واعتقد انك تحملت مسؤولية بيت كامل ماعتقد انك عاجز على انك تتحمل مسؤولية نفسك .
انتهى كلام ابوي .. طلعت من الغرفة ولا عرفت اعلق .. رجعت وسكرت باب غرفتي وجلست مع نفسي ساعات وساعات افكر واراجع سجل ذكرياتي هالسنه والتصرفات اللي سويتها بالاضافة الى النتيجة اللي وصلت لها .
بعدها جلست ابكي واتحسف على كل لحظة مرت بها الترم .. والاهم كان بالنسبة لي محمد وباسل اللي حسيت اني بديت اخسرهم فعلا .. وانا مالي غيرهم وهم اقرب اشخاص بالنسبة لي .
بدأ الترم الثاني .. وبديت معاه بداية قوية وحاولت اجتهد باللي اقدر عليه على شان اعوض اللي راح مني بالترم الاول . بدت علاقتي مع اصحابي محمد وباسل ترجع طبيعية .. اما بالنسبة لزميلي الجديد " محمد " .. زادت علاقتي وفيه وكنت دائما اكلمه واعزمه على أي طلعه لنا انا وباسل ومحمد .. واول مرة طلعنا مع بعض كانت لـ حديقة الحيوانات ... كانت لحظات مستحيل انساها .
انتهت السنه الدراسية وانتهت ثاني متوسط .. والحمد لله قدرت اعدل نسبتي ومانتهت السنه الا وانا جايب امتياز ... اول شي خطر ببالي لما استلمت الشهادة " ابوي وامي " امي لانها عانت وتعبت نفسيا بسبب اهمالي .. وابوي على شان اثبت له اني قد المسؤولية . اول ماقلت لامي فرحت ومن الفرحة اتصلت على ابوي وقالت له .. الغريب ان ابوي رد عليها ولا علق ورد بكل برود وقال : طيب .. اول ماسكرت امي السماعه سالتها وانا كلي ثقة " ابوي وش قال " ؟ .. قالت : يقولك مبروك ..
انصدمت من ردة الفعل توقعت شي اكثر من كذا .. توقعت جمله ترفع معنوياتي ع الاقل ... امي شافتني محبط شوي قالت ماعليك مو انت تبي سيكل وحنا ماشريناه لك على شان دراستك .. اول مايرجع ابوك بنروح ونشتري لك سيكل . دخلت غرفتي ونمت .. قمت على صراخ اخواني .. طلعت ابي اشوف وش سبب هالزحمه  اول ماشفت السيكل .. ماعلقت ولا عرفت اتكلم ولا اسال هالسيكل لمين ناظرني ابوي وقالي : مبروك يابطل وهذي هديتك مو من اول تبي سيكل !!! فرحة فرحة مو طبيعية
يمكن فرحتي ماكانت بالسيكل كثر ماكانت فرحتي بأن ابوي تذكر هالشي وقدر الشي اللي سويته . بها الاجازة ماسافرنا بسبب ظروف عمل ابوي .. طبعا هالاجازة ماخليت شارع بحارتنا مالفيته بالسيكل حقي كنت مبسوط فيه مرة وبالفعل كان بهذاك الوقت طموحي هالسيكل .. كنت اطلع من العصر وارجع على الساعه 9 تقريبا .
ابوي حب يعوضنا عن الاجازة هذي واللي ماراح نسافر فيها .. و اخذ من عمله اجازة لمدة اسبوع وقرر يودينا زيارة لعمتي بجدة . كنت مبسوط من الخبر خصوصا اني راح اشوف ولد عمتي عبد الرحمن .
رحنا جده وكان اليوم الاول والثاني من اروع الايام .. طلعنا كل مكان انا وولد عمتي وكنا دائما نجلس نتكلم عن ذكريات زمان وعن المصايب اللي سويناها وحنا صغار .
في اليوم الرابع .. كنا راجعين انا وعبد الرحمن من برا ودخلنا البيت وكان البيت فاضي " الكل كان طالع باستثناء بنت عمتي الكبيرة " . قالي عبد الرحمن : روح اسالها اذا تبي اخلي السواق يجيب لها عشا ولا لا وانا رايح اسوي لنا شاهي .. قلت طيب
طلعت وسالتها وجاوبتني وقالت : لا ماودي بشي .. نزلت وقلت لعبد الرحمن وقلتله انها ماتبي شي .. قالي : تاكد لان السواق بيروح يجيب اغراض للبيت اذا تبي خلها تقول على شان يجيب لها وهو جاي
طلعت مرة ثانية وسالتها .. وكان ردها صدمة .. صرخت بوجهي وقالت : ماتفهم انت قلتلك مابي عشا !!!!
انصدمت من ردها ونزلت بدون ماعلق ولا اتكلم .. رحت غرفة ولد عمتي وبكيت من القهر .. ماتعودت احد يرفع صوته علي وبدون سبب !!
رجعو اهلي من برا والكل استغرب اني ماني جالس معهم بالصالة .. قال : ابوي لعبد الرحمن : روح ناد نواف
جاني عبد الرحمن وقالي : ابوك يقول تعال اجلس معنا .. قلتله مالي خلق .. قال : براحتك
راح وقاله .. ابوي استغرب وقال طيب انا بنزل اشوف وش قصته .. نزل ولحقته بنت عمتي لانها حست انها السبب بها الشي ونزل ولد عمتي معهم
نزل ابوي وشاف وجهي مو طبيعي ... قال : نواف فيك شي ؟ .. قلت : لا مافيني شي بس ابي انام
قال : واللي يبي ينام يصير وجهه كذا !! قاطع ولد عمتي عبد الرحمن كلامنا وقال : يا خالي نواف كان يصيح لان اختي صارخت عليه
ابوي سمع هالكلام وتنرفز والى الان مادري وش سبب هذيك النرفزة !! ضربني قدام ولد عمتي وبنت عمتي
الى ماجا ولد عمتي الكبير ووخر ابوي عني .. جلست اصيح من قلب .. مو من الضرب لكن من تصرف ابوي واللي حسيته انه جامل بنت عمتي على حسابي انا !!
مانمت هذاك اليوم الا بعد ساعات من اللي صار .. نمت من التعب .. جا اليوم الثاني ودرت امي بالسالفة وتضايقت وصارت مشكلة بالبيت كله والسبب انا
نزلت بنت عمتي تعتذر مني .. اول مادخلت سلمت وجلست تعتذر
قالت : نواف للحين شايل علي ؟؟
يمكن نظرتي لها كانت جواب كافي ووافي .. نظرتي كانت كلها حقد وكره .. وكأني اقولها : مستحيل انسى هالشي ... مارديت عليها قالت: طيب ع العموم انا اسفه .. وطلعت . كانت اول مرة بحياتي احقد على شخص بها الطريقة !!!
يمكن مع الوقت عرفت هالعيب اللي فيني .. هو اني من الناس اللي اذا اخذت موقف من شخص مستحيل اغير نظرتي مهما صار !! ومستحيل علاقتي ترجع معاه مثل ماكانت اول ...
جاني ابوي بعدها واعتذر لي .. كنت شايل عليه بس يمكن اعتذاره لي وقدام الكل خلاني ارضى شوي .. بس الموقف كان ماثر فيني حيل خصوصا ان ابوي ماعمره ضربني بهذيك الطريقة غير هالمرة .. وكانت اخر مرة لكن مستحيل انساها .
رجعنا الرياض .. ورجعت الامور طبيعيه نوعا ما .
محمد وباسل كانوا مسافرين وهالشي كان مضيق خلقي شوي .. بس صاحبي الجديد " محمد " كان موجود بالصيف وكان مسجل بحلقة تحفيظ .. زرته مرة بيته وجلسنا نسولف عن الدراسة وبعض المواقف اللي صارت لنا بها السنه . بعدها قالي : نواف ليش ماتدخل معي تحفيظ مادام ماعندك شي ؟ .. قلت: اسجل ليش لا .
رجعت واول مارجعت قلت لابوي وامي اني بسجل بحلقة تحفيظ .. استانسو حيل خصوصا اني بهالسنه كانو اهلي متضايقين لاني اسبوعيا كنت اشتري شريط اغاني .. وكانو ينصحوني لكن لاحياة لمن تنادي !!
بديت احضر التحفيظ مع محمد .. بعدها محمد نصحني ارمي اشرطة الاغاني اللي عندي على شان مافكر ارجعلها .. وفعلا هذا اللي صار ورميتها كلها .
ابوي كـ نوع من التشجيع جاب لي هدية .. كانت عبارة عن جوال " اريكسون " .. هذاك الجوال ماغيره اللي اذا صكيته براس واحد اغمى عليه
 تقريبا يشبه الشي هذا فرحت بالجوال بشكل مو طبيعي ... بس للاسف محد كان يدق علي واذا دق قال غلطان
من الزهق كنت ادق على الاتصالات واذا رد الموظف سكرت << بزر ماينعطى جوال
//
بدت السنه الدراسية الجديدة وبديت معها حياة جديدة ... اول مارجعنا للدراسة قابلت باسل ومحمد وسلمت عليهم وقلت لهم الخبر اللي استغربو منه كثير وبنفس الوقت فرحو لي .. اللي هو اني " التزمت " وتركت الاغاني مرة وحدة . استغربو هالشي مرة خصوصا اني كنت اكثر واحد فيهم اسمع اغاني .. سالوني وش اللي غيرك وقلتلهم قصتي مع محمد وان هالشخص غير فيني اشياء كثير .. واني سجلت بحلقة تحفيظ بالصيف والفضل كله يرجع لله ثم لـ محمد . زادت زياراتي لمحمد وزادت علاقتي فيه .. وبدل مانكون ثلاث اصحاب صرنا اربعه دائما مع بعض .
واشتركت بجماعة التوعية السلامية وكنا نسوي نشاطات رائعه .
بنهاية السنه قالنا ابوي الخبر اللي كان صدمة بالنسبة لي .. وقالي ان بيتنا جاهز واننا راح نقل من الحي وبالتاكيد راح انقل من المدرسة ..!! تضايقت بالبداية خصوصا اني راح افارق اعز اصحابي .. بس ابوي كان دائما يحاول يخفف عني بكلامه " بتشوفهم برا المدرسة ووقت ماتبي اوديك لهم اوديك المهم لاتضيق خلقك "
انتهت ثالث متوسط .. انتهت بخيرها وشرها بحلوها ومرها .. وانتقلنا لبيتنا الجديد ... وانتقلت الى مدرستي الجديدة .
الثانوية كانت المرحلة اللي ودعت فيها طفولتي نهائيا .. المرحلة اللي كل شخص مو بس انا صارت طموحاته غير وطريقة حياته غير . بداية الايام كنت مو منسجم مع الفصل ابدا .. خصوصا ان طلاب فصلي العزيز " اول سابع " كانو من اكثر الفصول شغب بالمدرسة ومن اول شهر بالمدرسة جانا الوكيل وبدأ يهدد ويتوعد اذا مانضبط الفصل . كنت هادي بطبيعة الحال وماكنت احاول احتك بأحد .. بالبداية كانو بعض الطلاب يحاولون يضايقوني او يستفزوني .. حاولت مارد وحاولت اكون هادي .. بس سبحن الله دائما الطبع يغلب التطبع في وحدة من الحصص .. جا واحد من الطلاب ويمكن يسمونهم بالعامية " زحيف الفصل " .. واستفزني بكلامه وجلس يستخف دمه .. بدون ماناقشته او ارد عليه قلتله " اذا عندك شي اذا طلعنا من المدرسة نتفاهم زي الرجال .. مو تستقوي قدام خوياك " .. رد علي وقالي : بس كذا .. ماطلبت شي .. وكمل استهباله وبعدها رجع لمكانه . انتهت الحصص وانا ماني مركز لا بشرح ولا بشي .. كل همي اطلع حرتي بها الشخص .
طلعنا نصلي بالمصلى .. رحت لخوي الولد وقلتله : قل لخويك الوعد قدام البوابة الفرعيه << حركات الهياط ايام زمان فلة .. الولد قال : انت للحين معصب خلاص ياخي انسى !! .. قلت : وش انسى لعب عيال هو .. خله ينتظرني هناك وبس طلعت لقيته منتظر هناك .. رميت شنطتي ورحت طيران عليه وبدون أي مقدمات صكيته كف على عينه << شلون كف على عينه لحد يسالني مسكني وكملنا طق وجا خوي الولد وفزع له وطحنا كلنا بالارض .. شوي ولا واحد من طلاب الفصل جا وفكنا واخذني بعيد وحاول يهديني .. انتهت المشكلة وجا السواق ركبت ورجعت البيت .. حسيت بالوناسة خصوصا اني طلعت حرتي بها الكـــف المخلبي
اليوم اللي بعده دخلت وانصدمت بردة فعل الفصل !! لاول مرة ادخل بدون ماسمع أي تعليق او أي تلميحة .. الكل ساكت ولا احد حاول يحتك فيني . جا بعدها زميلي اللي جالس جنبي " سلمان " .. وبدا يتكلم معي ويسالني " من وين جاي .. طيب شلونك بالدراسة .. طيب وش سيارتكم " << لـ وهلة حسيت انه ناوي يخطبني على هالاسالة
سلمان قلبه طيب حيل ويمكن اكثر شي كنت احبه فيه انه صريح ويقول رايه بكل صراحة وبدون أي مجامله .. كانت علاقتي معه بالمدرسة .
كنت انتظر كل ويك اند يجي على شان اقابل الثلاثي المرح " اصحاب المتوسط " .. كنت كل ماقابل محمد وباسل ومحمد .. استغرب من تصرفات محمد .. الشخص الخلوق الملتزم واللي كان دائما قدوة لطلاب المتوسط كلهم .. كنت الاحظ عليه ان طريقة كلامه تغير وبعض المرات لما نتقابل بالويك اند مايجي ويتعذر باعذار غريبة . مرة من المرات اتصلت على محمد وقلتله بزورك قالي اوكي انتظرك .. رحت وقابلته وجلسنا نسولف عن الدراسة وعن اول ثانوي وعن الضغط بالدراسة . فجاه وبدون أي مقدمات قالي : فاتك نواف امس انا واثنين من الشباب رقمنا بنات !!!!
وجهي صار الوان وكأن احد كب على وجهي موية بارد .. جلست ساكت شوي بعدين ابتسمت وقلت : كم اعمارهم اكيد بالابتدائي " الى الان اقول انه يمزح واني فهمت غلط "
رد علي باستغراب : نواف وش ابتدائي اقولك رقمت تقولي ابتدائي !!
قلتله : محمد من جدك ولا تمزح !! .. ضحك وقال : يابن الحلال وسع صدرك اهم شي الوناسة .. بس من جد يبيلي اعرفك على خوياي والله انهم فلة !! جلس يكمل ويسولف لي ويقولي عن مغامراته مع الشلة الجديدة !! .. وانا ساكت واناظر فيه واقول بنفسي حسافة الايام يامحمد .. .. ضحكت بداخلي وقلت والله دنيا !! بيوم وليلة الانسان يتغير مية وثمانين درجة
انتهى اليوم ورجعت البيت وانا منصدم .. اتصلت على باسل اقوله اللي صار .. رد علي وقالي : حنا على شان كذا تركناه وخليناه مع شلته الجديدة .. قلتله : يعني كذا بكل بساطة !! تغيير جذري وبدون أي سبب ؟؟ قالي : والله يانواف علمي علمك بس الولد حالته مرة سيئه ومن سيء الى اسوأ .. حتى مستواه بالدراسة صار سيء .
هذيك الفترة كان شغلي الشاغل اعرف وش السبب اللي خلى محمد يوصل لها المرحلة .. وخلاه ينقلب مية وثمانين درجة //
يتبع ... |
|
|
