| dr.nawwaf's profile҉ਿ°●φ¸¸.»» N e F o ««.¸¸...PhotosBlogLists |  Tools  Help |
|
June 03 // الجــزء الرابع // نـــــوافمحمد اعطاني اول درس بالحياة .. علمني ان حال الشخص ممكن ينقلب بين يوم وليلة .. سبحن الله يغير ولا يتغير . كنت متأكد ان هالشي وراه سبب.. قررت اعرف وش هالسبب واحاول اعدل ولو شوي بالوضع . زادت زياراتي لمحمد .. كانت فترة مافيها لا اختبارات ولا شي واستغليت هالشي وكنت ازوره كل ويك اند . قابلته وسلمت عليه وطلعنا نتمشى .. جلست اسولف معه واساله عن دراسته وعن احواله .. كان يجاوبني باجوبة شخص ماهو مهتم بأي شي وهمه وناسته وبس .. ذكرني باهمالي بثاني متوسط . جلس يسولف لي عن مغامراته مع اصحابه وعن انجازاتهم !! كنت اناظر محمد ومستغرب من كلامه .. احسه يتكلم وهو مقتنع بالشي اللي يسويه . قاطعت كلام محمد وقلتله : طيب محمد ليش هذا كله !!! .. وين محمد اللي خلاني اترك الاغاني وين محمد اللي كان قدوة كل طلاب المتوسط .. وين محمد اللي كان يحاول يخليني اترك اي صفة شينه فيني .. فجاه بدون اي مقدمات وبكل بساطة تركت هذا كله !! طيب عطني سبب مقنع يخليك تصير كذا !! سكت شوي بعدها تكلم ... بدا يقولي مشاكله في البيت والضغط النفسي اللي يمر فيه .. وقالي على الاشكال الغريبة اللي تعرف عليهم .. من كلامه حسيت انه مو مقتنع بحياته الحالية ولا بتصرفاته .. لكنها الطريقة الوحيدة اللي يقدر ينسى فيها مشاكله . بديت ازور محمد كل ويك اند ومرات بايام الدراسة .. واحاول كثر ماقدر ماخليه يحتك برفقة السوء اللي خلوه بها الحال ... بدا محمد يحس بغلطه ويحاول يراجع نفسه .. وبدت شخصيته ترجع تدريجيا حسيت اني رديت الجميل للشخص اللي غير فيني اشياء سيئه كثير .. وبها الفترة زادت علاقتي محمد اكثر وكان اول ماتصير له اي مشكلة يتصل علي وكنا نقعد نتكلم بالساعات سواء عن الدراسة او عن اي شي . قربت الاختبارات وقلت زياراتي لمحمد .. وكنت منشغل بالاختبارات كثير خصوصا انها اول سنه لي بالثانوية وكنت احاول اثبت نفسي بأي طريقة . انتهت الاختبارات وعدت الامور على خير .. وكالعادة اتصلت على اصحابي محمد وباسل وقلتلهم ودي اشوفكم . كنت اتصل على محمد ويرد علي ابوه بكل وقت ويجاوبني بنفس الجواب : محمد مو فيه . لما قابلت محمد وباسل سالتهم عن محمد .. وليتني ماسالتهم قالولي انه رجع يطلع مع شلته .. وليت حاله وقف على زي ماكان اول !! .. صار اردى من اول وقتها حسيت ان محمد وصل لمرحلة مستحيل يرجع عنها .. نصحني باسل اني ابعد عنه على شان ماياثر فيني .. وهذا اللي سويته . // انتهت اول سنه بالثانوية وعدت على خير ... انتهت السنه بدون ماكون علاقات قوية واكتفيت بصداقتي مع سلمان اللي كانت بالمدرسة فقط لاغير . بالصيفية بدت أول ملامح التمرد عند الكائن اللطيف نواف  وأول ملامح التمرد " رفضي للسفر مع اهلي بالصيف "وقلت لهم بالحرف الواحد " مسألة اني اسافر معكم بعد كذا خلاص انسوها .. لاسافرت معكم احس اني طالع رحلة مو سفر !! " طبعا اهلي اخذوني على قد عقلي وقالولي براحتك وفضلت اني اقضي الصيفية عند ولد عمتي العزيز بجده .سافرت لعبد الرحمن بجدة .. كانت اجازة مميزة خصوصا اني قضيتها مع ولد عمتي العزيز . بهذيك الاجازة اكتشفت ان ولد عمتي عنده حاسة خنفشارية مرة من المرات كان عبد الرحمن منتظر زميله بالدراسة يجيه البيت .. وكنا جالسين بالمجلس نتكلم انا وياه على بال مايجي . فجاه عبد الرحمن قطع كلامي وقال : ياخي مدري ليه احس ان الولد صارله حادث !! .. طالعت باستغراب وقلتله : يابن الحلال فال الله ولا فالك وش هالاحساس الخايس  بعد هالكلام بربع ساعه اتصل زميل عبد الرحمن وبلغه ان صار له حادث مع السواق وانه ماراح يجي طالعت بولد عمتي بنص عين وقلت : عبد الرحمن وش سالفتك بالضبط !!!! .. قال: يابن الحلال قايلك عندي احساس ان صايرله شي << جعلك ماتحس مرة ثانية بعدها باسبوع تقريبا طلعنا انا وولد عمتي الكورنيش ... تمشينا وكان فيه مطعم مقابل الكورنيش .. رحنا تعشينا فيه وجينا بنرجع للكورنيش .. يوم جينا نقطع الشارع طالعني ولد عمتي وقال : نواف احس واحد منا بيسوي حادث قلت : عبد الرحمن قايلك قبل حاول انك ماتحس هالاحاسيس الخطيرة وانت معاي !! قال : لا ماعليك ان شاء الله بس يالله اول ماتحس الوضع كويس اركض واقطع الشارع .. قلت : طيب قطع ولد عمتي الشارع وسبقني .. لما جيت الحقه ولا سياره بوجهي !! .. صاحب السيارة لف يمين وصك بالسياره اللي جنبه واللي ورى اللي جنبه صك فيه ولفت سيارته وصكت باللي جنبه !! انا لاشعوريا ركضت من الخوف .. ركضت وركضت لين وصلت الكورنيش وكملت ركض لين مابعدت عن مكان الحادث . جلست على كرسي وجلست اتخيل اللي صار قبل شوي !!! شوي ولا ولد عمتي جايني ومبتسم ويقول : شفت قايلك  << طيف وين الوناسة بالموضوع  .. قاطعت كلامه وقلت : ياولد عمتي طلبتك حاول انك تصير خالي من الاحساسيس المخلبية وانت معي لين مارجع للرياض ..!! انتهى الموقف على خير وطلعت سليم بس كل ماتذكرت الحفلة اللي سويتها بالشارع يضيق صدري .رجعت للرياض اقضي فيها باقي الاجازة مع خوياي . مرة من المرات كنت طالع انا و " اتحفظ على الاسم " .. طلعنا تعشينا ولفينا بالرياض شوي بعدها رحنا نتمشى بحارتهم شوي .وحنا نتمشى فجاه لقينا بنت تتمشى بالشارع ويلاحقها شخص بسيارته .. فجاه لقيت خويي يصرخ ويقول : نواف هذي اختي !! .. قلتله شدراك يابن الحلال امداك تعرفها البنت متغطيه !! .. قال نواف صدقني هذي اختي والحقير هذا يلاحقها .. وقف السيارة .. نزلت وسبقته مع الحماس << فاهم الحماس غلط نزلت ورحت مسرع على الادمي وصرخت عليه .. هذا كبرك وماتستحي ياخي !!! ناظرني بنص عين وقالي : سلامات يالحبيب انت وش دخلك !! .. قلتله ياللي ماتستحي هذي اخت هالولد .. ناظرت ادور خويي ولا الحبيب عند السيارة ماتحرك ويناظرني ويهز براسه ويقول : لا لا طلعت مو هي !! << بدري وقتها حسيت الموضوع خربان خربان وبما اني تكلمت بكمل المسالة وخلاص !! سيارة الرجال كانت مظللة بالكامل ولا اشوف الا من الشباك اللي اكلمه فيه .. فجاه وانا اتهاوش معه نزل من الباب اللي ورى رجال ... رجل عريض المنكبين اسمر البشرة واضحة عليه ملامح الاجرام ..!!! قرب عندي .. ناظرته وقلتله نعم خير وش عندك !!!! << بزر ويهايط كانت اخر كلمه قلتها بالشارع هذاك ولا احد يسالني وش صار بعدها . نصيحة اخوية : لاتصير ملقوف على شان لا يطلعلك مثل هالشخص الجميل ويعلمك ان الله حق .!!! واذا مصمم تهايط تأكد من خلو السيارة من اي شخص يحمل المواصفات المذكوره أعلاه . // بداية ثاني ثانوي بالنسبة لي كانت مرحلة مختلفة .. المرحلة اللي بديت استرجع شريط ذكرياتي واقول سبحن مغير الاحوال .. وقتها حسيت اني كبرت وان نظرتي للحياة اختلفت .. وقتها ودعت ايام البراءه والطفولة وبديت افهم الدنيا أكثر وأفهم الناس أكثر . كانت بداية ثاني ثانوي بداية صداقات جديدة بالنسبة لي .. تقريبا صارت علاقتي بكل الطلاب بالفصل ممتازة وهالشي خلاني افلها بها السنه واشارك بجميع المقالب المخلبية اللي يسوونها طلاب فصلنا الجميلين على مدرسينا المساكين طبعا ثاني سابع كان مشهور ولله الحمد بأكثر فصل مشاكل بالمدرسة كلها .. ويوميا داخل على مدير المدرسة مدرس يقوله : يا اوستاز الفصل ده فصل وحش خالس !! زملائي المقربين بالفصل كانو كالتالي سلمان : اول صديق تعرفت عليه بالفصل .. صريح بزيادة وهذي ميزته واكثر شي يعجبني فيه .. واكثر شي يخلي اغلب طلاب الفصل يكرهونه << مجتمع يكره الصراحة للاسف  محمد : صديق سلمان المقرب وعرفني عليه طريق سلمان .. من اطيب الناس اللي تعرفت عليهم .. كاين حي مسالم جدا وبارد جدا وهاديء .. يعني احتمال لو يطيحون اهله من سطوح عمارة يجيب فصفص ويجلس يتفرج عليهم وهم يطيحون حسام : شخص طيب وعلى نياته .. موسوس بعض الشيء في الدراسة كنت اذا صرت زهقان اروح لحسام واقوله ترى اجابتك بذاك الاختبار غلط .. اقولها منا واشوف عجايب تصير سلــــطان : سلطان جانا بثاني ثانوي .. كائن حي مسالم جدا وحاله حال نفسه .. طبعا زيه زي اي طالب جديد يجي الفصل اخذ نصيبه من الذبات البايخة من طلاب فصلنا المماليح خصوصا شنطته الضخمه اللي الى الان مادري وش كان يحط فيها عبد الله : كائن حي نكته  هادي بالفصل لكن برا المدرسة كائن مرجوج وفله ... من هواياته ايضا رفع ضغط حسام  << ياحبكم للشر ثاني ثانوي بالنسبة لي كانت عبارة عن فترة نقاهه وترفيه .. طلعت فيها كل طاقاتي المكبوته استعدادا لثالث ثانوي .. السنه اللي كانت ولا زالت قلق كل طالب بثاني ثانوي .. على شان كذا طلعت كل اللي بخاطري هالسنه لدرجة اني كنت اطلع بشكل يومي وهالشي ماصار بالسنوات اللي قبل . من الاشياء المميزة لي بها السنه  بثاني ثانوي كانت بدايتي في قيادة السيارات << بدري كنت مستانس بها الشي بشكل مو طبيعي !! كانت بدايتي الفعلية بعد رمضان .. كنت اطلع من صلاة التراويح وابدأ ادور بشوارع الحي شارع شارع ... مرة من المرات رحت شارع غريب اول مرة ادخله وحسيت اني ضايع .. استخدمت ذكائي المخلبي وحاولت اوصل للبيت ولما وصلت خقيت مع نفسي  .. طبعا بعدين اكتشفت ان الشارع هذا بينه وبين بيتنا شارعين << بس هذا مايمنع اني لازلت خاق مع نفسي انتهت ثاني ثانوي .. وكانت نسبتي مش ولا بد بس المهم انها كانت امتياز << يرقع لعمره كنا نتوقع انه بمجرد نهاية ثاني ثانوي انتهى لحظات الوناسة وبدأت لحظات الهم والغم " ثالث ثانوي " كنا طوال الاجازة شايلين همها .. وكل ماقابلت محمد وسلمان وسلطان وحسام كان كل كلامنا عن ثالث واستعداداتنا !! كل ماتذكر كلامنا ذيك الايام اضحك لان مافي ولا مخطط سويناه وكلها كانت عبارة عن لحظات حماس فقط لاغير ... وكان فصل ثالث سابع له كلمة اخرى بثـالث ثانوي كانت بدايتنا بثالث ثانوي حماسية .. اكثر يوم كنت اضحك عليه يوم مارحنا نشتري الدفاتر .. اول مرة اشوف كائنات تحتار بالدفاتر << فاهمين الحماس غلط قبل ثالث ثانوي بكم يوم اجتمعت انا والشلة الكريمة وكان اخر اجتماع قبل بداية ثالث ثانوي قررنا فيه اننا نشد حيلنا ونخفف من الطلعات والسهرات ونحاول قدر الامكان اننا ندرس يوميا << نواف ويدرس يوميا شلون عاد حلوها انتم أول اسبوعين بالدراسة كنت الاحظ ان الكل شاد حيله .. كنت اول مارجع من المدرسة انام لي ساعتين وبعدها اقوم وابدأ اراجع كل الدروس اللي اخذتها . بعد بداية الدراسة بشهر بديت اراجع بس المواد المهمة << بدأ يخور مامر شهر ونص الا ونواف يرجع من البيت يرمي شنطته وينام ومايقوم الا المغرب واول مايقوم يشغل السوني لين وقت العشا << طلع على حقيقته في الواقع وفي الحقيقة مو بس انا اللي رجعت الى طبيعتي .. ثالث سابع بكبره رجع الى سابق عهده الفصل المشهور بالمدرسة بانه يحتوي على كميت كائنات ترفع ضغط المدرسين !!اكثر شخص يمكن حسيت اننا اجرمنا فيه مدرس الحاسب << درسنا اول وثاني ثانوي هالمدرس طلب من الادارة انه مايدرسنا بثالث ثانوي وجابولنا مدرس ثاني .. ولكن بنص الفصل الدراسي الأول وبسبب ظروف المدرس الأول قررو اننا يرجعولنا مدرسنا المليح اول مادخل الفصل وشاف وجيهنا جته كئابه المنظر وسوء المنقلب !! وتذكر الايام السيئه اللي عاشها معنا .يمكن بالمدونات اللي قبل سبق وتكلمت عن المواقف اللي سويناها بالمدرسين الله يذكرهم بالخير وعسى ماهم بشايلين علينا كنا نحاول نعيش هالسنه بحلوها ومرها .. وكأننا نودع ثالث ثانوي بذكريات مستحيل اي واحد فينا ينساها .. حتى اللي كان بينه وبين شخص اي مشكلة حاول انه يرجع علاقته معه .. الكل يعرف اننا خلاص بعد هالسنه بنفترق وكلن بيروح يدور مستقبله قربت الاختبارات النهائية .. والكل شد الهمة وحاول يركز قدر الامكان . اما بالنسبة لي .. كانت عقدتي في ثالث ثانوي وفي كل مراحل الدراسة عموما هي " الرياضيات " ..!! وحاولت اواجه هالمشكلة بثالث ثانوي واحلها لان هالمادة ممكن تخسف المعدل وتجيب فيني العيد . قبل اختبار الرياضيات باسبوع ونص بديت ادرس هالمادة اللعينه .. لدرجة اني غبت عن المدرسة لان وقتها ماكان عندنا شي وكنت يوميا اقوم الصبح واحاول احل تمارين اضافية .. لعل وعسى تجيب نتيجة كانت دراستي كوميدية نوعا ما كنت اقوم الصباح افطر واروق شوي وبعدها اجلس على المكتب واشغل ام كلثوم وبالتحديد اغنية " قصة الأمس " .. وافتح دفتر الرياضيات وابدأ احل <<< لحد يسألني وش هالمسكة الغريبة جا اختبار الرياضيات الصاعق !! والكل يذكر هذاك الاختبار المخلبي اللي دمرنا تدمير !! اول مافتحت الورقة جيت عند اول فقرة ماعرفتها توترت شوي بعدين قلت ياولد بتعرف اللي بعدها ... رحت للي بعدها ونفس الشي ..!! المضحك اني نسيت كل الرياضيت وماجا على بالي الا اغنية ام كلثوم جلست اغني بنص القاعه بصوت خفيف واحسب بالالة الحاسبة كم درجة ممكن تضيع علي بها الاختبار اللعين !! << ليش ماغني على الاقل شي حافظه ومتاكد منه رجعت البيت محبط تماما !! اول ماشفت امي قلتلها " يمه خلاااااااص لا طب ولا يحزنون افتحولي مطعم خلوني اشتغل فيه اصرف لي " ذاك اليوم مستحيل انساه .. واتوقع اي طالب بدفعتي ماراح ينساه .. اختبار حطم الكثير وحسس الكثير بأن كل احلامهم ضاعت !! حاولت اركز بباقي الاختبارات واطلع بأقل ضرر ممكن .. والحمد لله عدت الاختبارات الباقية على خير . بواحد من الاختبارات كنت طالع من المدرسة وبالصدفة شفت صديقي العزيز " حسام " وقلت بما اني من زمان ماشفت حسام بسبب الاختبارات خلني امارس عليه هوايتي المعتادة رحت وقلتله حسام شخبارك وشلون اختبارك ؟ .. اول ماشافني قال : نواف اسمع اذا بتجيب لي طاري الاختبار وتلحسني ترى ماراح يصير لك شي كويس قلتله ياخي وسع صدرك انا طالع علي غلط ولا قلت شي .. قالي الله يعين !! .. قلتله ياخي غلط يقهر .. لما سالني وش الغلط اكتشفت انه هو غلط نفس الغلط ولاكان يدري انه غلط << مايحتاج اقولكم حسام وش سوى فيني هذاك اليوم ..!!انتهت الاختبارات ولكن للاسف اثار الاختبارات مانتهت ..!! جلست لمدة خمس ايام اقوم من النوم فجاه و اقول " ياساتر نسيت احل الفقرة الفلانية !! .. واجلس احول بالسرير وادور ورقة الاختبار على شان اعدل .. وبالنهاية اكتشف اننا خلصنا اختبارات وارحم نفسي وارجع انام !! << والله ايام الواحد ينرحم فيها طلعت النتايج والحمد لله كانت نتايجنا كلها كويسة ... بعدها بدينا بالجولة الثانية " التقديم على الجامعات " الفترة هذي كانت من اصعب الفترات بالنسبة لي .. فترة انفجر مخي فيها من كثر التفكير ..!! ابوي يقولي ادرس خارج المملكة وخلك عن الطب وروح ادرس اي تخصص ثاني ... امي تقولي ياولدي ابيك طب .. سلمان يقولي خلك من هذا كله وتعال البترول .. حسام يقولي تعال معي ندرس بامريكا .. سلطان يقولي خلك بالملك سعود وادخل معي السنه التحضيرية ..!! حسيت ان الكل يبي شي الا انا جالس مادري وش ابي بالضبط .. شعور شين ان الواحد يحس ماله رغبة قوية بشي معين كان اكثر شي متقبله نوعا ما " فكرة دراسة ادارة الاعمال خارج المملكة " .. وكنت كل ماجيب هالطاري قدام امي يضيق صدرها وتقولي مابيك تبعد عننا ابيك تدرس بالملك سعود وابيك تصير دكتور ..! انفجر مخي من كثر التفكير وكنت اتصل واسأل اكثر من شخص عن تخصصه وطبيعة الدراسة ومستقبلها الوظيفي .. الخ استخرت وقررت بالنهاية اني ادرس بالملك سعود وادخل السنه التحضيرية للكليات الصحية . فرحت امي بها الخبر لانه هذا الشي اللي كانت تبيه . اما حسام قرر انه يدرس هندسة حاسب بامريكا .. ومحمد قرر انه يدرس بالمدينه المنورة حاسب .. اما الشخص اللطيف سلمان قرر انه يدرس بجامعة الملك فهد للبترول والمعادن .. أما عبد الله وصديقي الصدوق سلطان دخلو معي السنه التحضيرية . اما اصحاب الطفولة " محمد وباسل " .. قررو انهم يدرسون طب خارج المملكة . يمكن اكثر شي خلاني اكره الجامعه قبل لا ادخلها هي هاللحظات الصعبة .. بيوم وليلة كل شخص اتخذ قراره وكلها ايام وكل شخص بيروح يدور مستقبله .. وبنفترق ..!! يتـــبع ... |
|
|
