| dr.nawwaf's profile҉ਿ°●φ¸¸.»» N e F o ««.¸¸...PhotosBlogLists |  Tools  Help |
|
February 02 ::: نـــواف ::: الجزء الســـادس كلية طب الأسنان دخولي لها الكلية كان أكبر من مجرد فرحة كان رد لكثير من اللي كانو يرددون علي بالبرنامج الموحد اني جبت نسبة الثانوية بالحظ وان السنه التحضيرية هي المقياس الحقيقي للاسف المجتمع السعودي بشكل عام مجتمع فيه نسبة حسد شنيعه .. وحب للتحطيم بشكل مو طبيعي وهالشي واجهته بعائلتنا بثالث ثانوي وبأول سنه لي بالجامعه .. بس الحمد لله ربي وفقني واثبت لهم اني قد المكان اللي وصلت له . بداية دخولي للكلية ماكان لي صداقات كثيرة بالدفعه اللي انا فيها باستثناء ابراهيم خويي بالسنه التحضيرية .. واحمد ومشعل وثامر اللي كانو معي بالثانوية لكن كانت علاقتي فيه سطحية جدا . بالصيفية حقت السنه التحضيرية تعرفت على شخص من منتدى الجامعه ومن حسن الحظ اننا تخصصنا نفس التخصص " طب أسنان" هالشخص كان " مسفر " كنا بالصيف نتكلم عن الكلية بشكل عام وكان كل شخص يستفسر من الثاني عن الكلية . والشخص الثاني كنت اعرفه من الموحد لكن ماكان لي أي احتكاك فيه اللي هو " فهد " فهد طبعا له قصة مميزة  فهد كان أول شخص تهاوشت معه بمنتدى الجامعه اذكر صار نقاش حاد بيني وبينه في موضوع من المواضيع .. وثاني يوم قابلت خويي عبد الله قلت تعرف فلان اللي بمنتدى الجامعه قالي ايه قلت ورني اياه ابي اتفاهم معه << انت لو الله يفكك من الهيط بس قالي تشوف القصير اللي جالس بالزاوية لحاله .. قلت ايه قال هذاك فهد .. قلت الحين هذا طوله وشوله يهايط طيب نرجع لموضوعنا .. فهد كان معي بكليتي الجديدة وعرفته بأول يوم لنا بالكلية لكن ماكان بينا أي احتكاك بحكم انه مايعرفني وان مافيه أي رابط جميل سابقا يربطني فيه باستثناء الهواش اللي صار عرفت ابراهيم على زملاء الثانوية " احمد ومشعل وثامر " .. وكنا بالاسابيع الأولى تقريبا مع بعض دايم . طبعا ابراهيم كائن غريب بعض الشي وله طلعات غريبة عجيبة لذلك كان كل خوفي انه مايتأقلم مع خوياي بس طبعا ابراهيم أثبت لي العكس يوم من الأيام دقيت على ابراهيم قلتله وينك قال مع خوياي .. قلت من خوياك قال ياخي مع مشعل واحمد وثامر <<< لاحظو خوياي // أما مسفر الكائن الخجول .. جلست تقريبا شهر وانا اكلمه مسن ولا اعرف شكله ولا يعرف شكلي " سمايل " مرة من المرات حاولت اوصف لمسفر شكلي لعل وعسى يعرفني لاني عجزت اعرفه .. قلتله مسفر تشوف الادمي اللي يمشي مع فلان وفلان ومعه يقول ماذكره .. قلتله طيب اللي معه شنطة شكلها كذا وكذا .. قال ياخي ماعرفتك :S اخر مافقدت الأمل قلتله يابن الحلال أنا ابو شوشة ..!! قال اييييييييه بس عرفتك << وقتها حسيت ان الشوشة من المعالم المهمة بالنسبة لي // من المتعـارف عليه بالكليات الصحية ان كل دفعه يكون فيها ليدر للطلاب مسؤول عنهم ويتواصل مع دكاترة المواد اللي ناخذها .. كان ليدر دفعتنا هو المليح " سامي " سامي شخص جدا هاديء ووسيع صدر .. يتحمل شكاوي الطلاب اللي انا لما اسمعها ودي انط ببطونهم واحد واحد << جعلك ماتصير ليدربداية الترم كانت علاقة الشلة بسامي جدا سطحية لكن طيبة هالولد وتعاونه معنا خلانا ناخذ عليه بسرعه وكنا نشوفه كثير خارج الكلية لما نجتمع بالويك اند . كانت شلتنا تقريبا هذيك الفترة عبارة عن : أنا .. ثامر .. احمد .. مشعل .. مسفر .. ابراهيم .... بالاضافة الى فهد صديقي اللي تهاوشت معه بمنتدى الجامعه وعرفني عليهم ابراهيم بحكم انه كان يعرفه قبلي .. ليدرنا سامي .. وفهد وحمد اللي كانو معنا بالقروب بالسنه التحضيرية وعلاقتي فيهم كانت مجرد سلام فقط لا اكثر ولا اقل// اثار الموحد كانت الى نصف الترم الأول مسيطرة علي .. اتذكر المواقف الصعبة اللي مريت فيها .. اتذكر المواقف الحلوة اللي ضحكت عليها .. اتذكر الاشخاص اللي مرو علي وتعرفت عليهم والان هم من اقرب الناس لي كنت ادخل منتدى السنه التحضيرية بشكل يومي اكثر من الاسنان .. واكتب لطلاب الدفعة الجديدة بعض النصائح اللي ممكن تفيدهم بالفصل الدراسي الأول .. الى ماجا يوم وطلب مني مدير المنتدى أصير مشرف القسم .. وافقت طبعا بدون أي تردد لاني حسيت بها الشي ممكن افيدهم أكثر وأكثر .. وتجربة جديدة حبيت اجربها . كانو فهد ومسفر دائما يساعدوني ببداياتي بالاشراف بحكم انهم من اعضاء المنتدى .. ويمكن هالشي في البداية خلى علاقتنا تصير اقوى من باقي الشباب اللي توني تعرفت عليهم . بدايتي كانت بكلية طب الأسنان كانت سيئه بعض الشيء .. خصوصا اني كنت خايف من " المهارات اليدوية " واثرها علي .. ماعمري جربت مهاراتي ولا اعرف هل راح اتوفق بها الشي او لا لذلك كنت خايف من هالشي اكثر من أي شي ثاني . اخذنا بالسنة الاولى مقدمات عن الاسنان بالاضافة الى محاضرات التشريح اللي تجيب الهم " سمايل واحد خانقته العبرة " كانت الفترة اللي ناخذ فيها عملي أسنان من أسوأ الفترات اللي امر عليها بالكلية .. خصوصا ان دكاترتنا الله يحفظهم عندهم موهبة في " التحطيم " سواء الطالب كان مبدع أو لا عيبي من بين الطلاب اني عمري ماحسيت بنقص عن باقي الطلاب بدراستي سواء بالثانوي او قبلها ... ولأول مرة بديت احس بها الشي وكان شعور سيء سيء مقدر أوصفه لو تكلمت من هنا لبكرة . كل ماسمع أي انتقاد من أي دكتور بالكلية اطلع ضايق صدري ومعصب وأفكر بالتحويل من الكلية . طبعا مثل مايقولون " شر البلية مايـُضحك " وقتها كان ولد خال صديقي فهد يعاني نفس معاناتي بالعملي .. وكل مادور بالمعمل اسولف مع خوياي احصله مثلي يدور اناظره واضحك واروح اسولف معه شوي مرة من المرات قمت من ضيقة الصدر وقلت دامني ماعرفت اشتغل خلني اشغل خلق الله بسواليفي وبالمرة اشوف صديقي المعملي عبد الله ادور يمين يسار مالقيت عبد الله .. قلت بعقلي " افا حتى عبد الله تعلم وانا توني " : ( لين فجاة اسمع صوت باخر المعمل يقول " يافلان ماسمعت اخر الاخبار " << عبد الله ماسك واحد وطاقه سواليف  خخخخخخخخخخضحكت ورحت له وجلسنا نسولف شوي لين انتهى الوقت وطلعنا . وقتها عبد الله صار يطلع معنا بالاضافة الى زميلنا بالكلية وصديق عبد الله " عبد الرحمن " .. الملقب بالبومة كان لقب الشلة بالكلية هذيك الفترة " شلة الـ 12 حرامي " كان مكاننا بالقاعه دايم بالزاوية اليمين انتهى الفصل الاول لنا بالكلية .. كانت فترة تعارف مابين الطلاب ومابين الطلاب والكلية .. انصدمنا فيها شوي بحكم انه نظام الكلية كان يختلف عن السنه التحضيرية بشكل كبير . باخر اسبوع لنا بالدراسة اقترح علينا فهد اننا نسافر للكويت كم يوم .. المؤيدين للسفرة كانو " أنا .. فهد .. عبد الرحمن .. عبد الله .. ابراهيم " كانت علاقتي بعبد الله وعبد الرحمن ماهي قوية مثل علاقتي بفهد وابراهيم .. لكن السفرة هذي يمكن اقيمها انها من احلى السفرات بحياتي بالنسبة لي الاشخاص اللي الواحد يسافر معهم اهم من المكان اللي بيروحون له .. وفعلا هذا اللي صار معنا .. مع ان الكويت مافيها ذاك الزود لكن انبسطنا فيها بشكل مو طبيعي . اذكر اول مامسكنا الخط صارو موقفين يمكن غيرو جو الرسمية بالسيارة الموقف الأول كنا عند محطة تونا معبيين بنزين واخذنا عصيرات وحركات ومسكنا الخط .. بعدها جا فهد قال يالله ياشباب دعاء السفر فهد قال شوي منه ولخبط ماعرف يكمل .. وابراهيم نايم وانا وعبد الله مانعرفه .. وعبد الرحمن كمل شوي وسكت .. ضحكت وقلت لعنبو بليسكم مافي ولا كلب منكم حافظ دعاء السفر ضحكنا وحاولنا نتذكره لين ماضبطت الامورالموقف الثاني<< كان سامج نوعا ما مني طبعا وحنا بالطريق جلسنا نسولف وضحك واستهبال << بينما برهوم الدجاجه منسدح بالمرتبه اللي ورى ونايم جلسنا نسولف ونتكلم عن الإختبارات وعن الأعياد اللي جبناها بالإختبارات <<< شر البلية مايضحك شوي قالي فهد نواف دق على أي احد من الشباب أسأله نزلت الدرجات ولا لا يمكن نزلوها اليوم الصبح قلت طيب واتصلت على واحد من الشباب( مسفر ) قلت صباح الخير شخبارك قال بخير قلت ها بشر نزلت الدرجات قالي لا مانزل شي .. وفي هذه اللحظه خطرت في بالي فكرة شريرة جدا .. قلت ياولد ألعب بأعصابهم شوي قلت أفا الدرجات زفت انا قلت كذا وخوياي اللي بالسياره كلهم صارت اشكالهم كذا  .. قالو نواف وش صار كم درجاتنا قلت اصبرو شوي خلني اكلم الولد واعرف وش السالفه <<< شرير قلت ها بشر كم أخذ برهوم قال نواف اقولك مانزل شي وش فيكـ قلت أفا برهوم اخذ ثلاثه من 15 قالي اهاااااا توني افهم جالس تلعب عليهم ياشرير قلت أفا وعبد الرحمن أخذ ثلاث ونص مو معقول ليش كذا عبد الرحمن سمعت درجته وصار شكله كذا  جا فهد قال نواف اساله كم درجتي بلييييز قلتله ابشر ولايهمك مسفر كم درجة فهد (طبعا مسفر ميت ضحك ع التلفون قلت اها فهد جاب خمسه << طبعا فهد عطيته اعلى درجة بينهم لانه هو اللي يسوق مالها داعي اقوله اخذت اثنين ونص ينهبل ويدخلنا بأقرب عامود كهرب >> يعني مو لله قلت طيب مسفر وانا قالي مسفر انت يانواف اكبر شرير على وجه التاريخ حرام عليك لاتضحك عليهم خلهم يستانسون بالسفرة قلت ماشاء الله انا اخذت سته ونص زين زين هذا وانا ماذاكرت جبت كذا "<< العيال سمعو درجتي منا وناظروني كذا  .. بعد كذا قلت يعطيكـ العافيه مسفر واسفين ع الازعاج وسكرت الحط بعد ماسكرت الخط اناظر اشاكلهم قسم بالله رحمتهم كل واحد حاط يده على راسه ومنصدم وصارت الوانهم صفراء قسم بالله الكافر يرحمهم << وطبعا هذا كله بسببي  بعد خمس دقايق بديت أحس بتأنيب الضمير  <<< بدري << المهم جاني تأنيب وخلاصقلت ياشباب ترى الدرجات مانزلت كنت امزح معكم قلت اغيرالجو شوي واخلي فيه اكشن وليتني ماقلت لهم  طقوووني لين قالو بس حتى فهد ماقصر وهو يسوق طقني المهم اني غيرت الجو << فاهم التغيير غلط // بسفرة الكويت صارت علاقتي بالاربعه اللي سافرت معهم جدا قوية .. وصارت طلعاتنا بالرياض دايم سوى ونجتمع بشكل يومي تقريبا وندرس سوا << المفروض انها دراسة بس مادري هي كانت عبارة عن وشو // مثل ماقلتلكم قبل حنا دفعة التجارب والقرادة .. اي شي جديد يجربونه فينا بدخولنا كلية طب الاسنان جانا دكتور جديد بمادة الكيمياء الحيوية .. ماقد درس دفعات الاسنان اللي قبل .. لكن كانت سمعته سيئه بكلية العلوم وهالشي كان مخوفنا شوي منه . الانسان كان فلة بشكل مو طبيعي .. يشرح عن البيئه .. عن الدين .. عن الاقتصاد .. فتاوى .. اي اي شي اي شي باستثناء المادة اللي المفروض يشرحها كان اسمه " علي قربان " .. شخص بمجرد انك تشوفه تحسه طيب وعلى نياته لكن سبحان الله ..!! بالفصل الدراسي الاول طبعا اعطاني اختبارين من اروع مايكون ..!! ماعرفنا نحل ولا ربع الاختبار .. الدفعه تحطمت وبديت اقتنع بالكلام اللي كنا نسمعه عنه . وصلت الوقاحة بها الشخص انه بدأ يطلع فتاوي من عنده ويهاجم الشيخ بن باز والمصيبة الأكبر من هذي ان كل هذا بمحاضرة " كيمياء حيوية " . رحنا واشتكينا كليتنا قالو مالنا علاقة الدكتور من كلية العلوم ..!! رحنا لرئيس قسم الكيمياء الحيوية وقالها لنا وبكل وقاحة وبجاحة " انتم ياطلاب الطب شايفين انفسكم على ايش مادري ..!! لكن عموما يصير خير ..!! وقتها صار بيني وبين رئيس القسم نقاش حاد بعدها حفظ اسمي وحفظ شكلي وحفظ رقمي الجامعي .. مابقى الا يحفظ عنوان بيتنا انتهت السنه على خير ماعدا هالمادة ..!! ورسبت فيها طبعا والسبب وشو الله اعلم  باستثناء الموقف اللي صار مع رئيس القسم ... رسبو اللي يبون ونجحو اللي يبون وعموما سكت وقلت ان شاء الله بالدور الثاني كل شي يتصلح واعدي المادة .كنت اجتمع مع خوياي ندرس .. كنت خايف من هالمادة لاني ادري ان الدكتور حاطني براسه .. من كثر مادرستها كنت اشرح لخوياي الدروس اللي معنا ..!! الصيفية هذيك كانت أسوأ صيفية مرت علي .. والاسوأ من كذا ان اختبار الدور الثاني كان اخر الاجازة يعني ماتهنيت فيها وكله بسبب هالادمي حسبي الله عليه . جا موعد الاختبار واختبرنا وكالعادة الجزئية حقت الداعية " علي قربان " محد حل فيها شي .. اما جزئية رئيس القسم حليت فيها اغلب الاسئلة وطلعت راضي عن نفسي بالاختبار اما خوياي طلعو من الاختبار لاحلو لاهذا ولا هذاك طلعت وقلت اكيد اني بنجح دامني حليت زين .. بشرت خوياي اللي شالو همي طول الاجازة وقررت اني اروح اعتمر انا ومسفر وفهد وسامي وعبد الرحمن على بداية الدراسة . طلعت النتائج .. نجحو كل الراسبين ماعدا انا .. وقتها السبب كان واضح جدا اذكر هذاك اليوم كأنه صاير أمس ..!! اتذكر وجه رئيس القسم وهو يناظرني ومبتسم ويقولي اني رسبت .. ونشوفك السنة الجاية ان شاء الله ..!! وقتها تذكرت الكلام اللي كنت اسمعه عن ظلم الدكاترة وكمية القهر اللي يحس فيها الطالب وهو يشوف مستقبله يضيع بسبب شخص لامسؤول ولا عنده لاذمة ولا ضمير . حمدت ربي وقلت ان شاء الله انها خيرة .. ومادامني دخلت الكلية عادي تأخير سنة ماكان بيضرني وقتها اكثر شي كان يهون علي وقفت خوياي معي .. كلهم بدون اي استثناء كانو شايلين همي اكثر ماشلت انا هم نفسي .. اتذكر وقفت عبد الكريم معي لما اتصل علي وقال ان منهجهم نفس منهجنا واخذني لبيته وشرح لي بعض الشغلات اللي مو فاهمها . اتذكر روحت سامي للجامعه على شان ينتظرنا الى بعد الامتحان ويتطمن علينا . اتذكر اتصالات الشباب اللي كانت بين فترة والثانية يسالوني عن دراستي ووش مسوي بالاجازة . اتذكر شلون تضايقو بالظلم اللي حصل لي واتذكر اتصالاتهم بعد ماخذت نتيجتي . اكثر شي كان مضيق خلقي مو التاخير بكثر ماكنت متضايق اني بدرس بقروب غير قروب خوياي ...ماكنت متخيل شلون بتصير نفسيتي بعد اللي صار .. وكنت أقول ان شاء الله انها " خيرة " . يتـــبع ... Comments (3)
TrackbacksThe trackback URL for this entry is: http://nefo4.spaces.live.com/blog/cns!594F94D6E7D034E3!1601.trak Weblogs that reference this entry
|
|
|
